មនុស្សយើងស្ទើរតែគ្រប់គ្នា តែងប្រាថ្នាចង់ឲ្យខ្លួនឯងមានជីវភាពធូរធារ ហើយបាននាំគ្នាខិតខំប្រឹងយ៉ាងខ្លាំងក្នុងការរកស៊ី ជួញដូរ និងអ្នកខ្លះទៀតប្រឹងធ្វើការថែមម៉ោងទាំងយប់ថ្ងៃ ឬមិនថាចុងសប្ដាហ៍នោះទេ គឺធ្វើយ៉ាងណាដើម្បីអាចរកប្រាក់ឲ្យបានច្រើន សម្រាប់បង្កើនទ្រព្យសម្បត្តិនៅក្នុងគ្រួសារ។
យ៉ាងណាមិញការតស៊ូប្រឹងរកទ្រព្យនោះ ពិតជាការល្អហើយ សម្រាប់អ្នកដែលចង់មានបាន ប៉ុន្តែការខំប្រឹងប្រែងខ្លាំងពេក វាក៏បានធ្វើឲ្យទ្រព្យសម្បត្តិដែលខំរកស្ទើរពេញមួយជីវិតនោះ បាត់បង់ទៅវិញក្នុងមួយប៉ព្រិចភ្នែកដែរ ដោយសារតែការប្រឹងប្រែងពេក ភ្លេចគិតពីរឿងសុខភាពជាសំខាន់។
ដូច្នេះឧកញ៉ាខ្មែរឥស្លាម អូស្មាន ហាស្សាន់ដែលមានទ្រព្យសម្បត្តិស្ដុកស្ដម្ភ បានផ្ញើសារក្រើនរំលឹកមួយក្នុងគ្រាដែលលោកកំពុងសម្រាកនៅមន្ទីរពេទ្យថា ទោះមានទ្រព្យសម្បត្តិ បុណ្យស័ក្ដិនិងគេគោរពស្រឡាញ់យ៉ាងណាក៏ដោយ មិនអាចជៀសផុតពីជំងឺដែរ ដូច្នេះត្រូវតែចេះរក្សាសុខភាពឲ្យបានល្អ។
រដ្ឋមន្ត្រីប្រតិភូអមនាយករដ្ឋមន្ត្រី ឯកឧត្តម ឧកញ៉ា អូស្មាន ហាស្សាន់ បានសរសេរក្នុងគណនីហ្វេសប៊ុកលោកថា "ជំងឺដែលមិនអាចឲ្យអ្នកណាមកជំនួសបាននោះទេ ទោះមាន លុយ ឡាន វីឡា មាស ប្រាក់ អំណាច យសស័ក្ដិ គោរមងារខ្ពង់ខ្ពស់ មានអ្នកគោរព ស្រឡាញ់រាប់អាន គាំទ្រប៉ុន្មានក៏ដោយ ដូចនេះត្រូវថែរក្សា សុខភាព អោយបានច្រើន"។
តើមិត្តអ្នកអានយល់យ៉ាងណាដែរចំពោះ សាររបស់ឧកញ៉ាមួយរូបនេះ?
ផ្ដល់សិទ្ធិដោយ៖KQUBE
