សិល្បៈ ៖ ជារឿងគួរឲ្យសង្វេគណាស់ ព្រោះតែស្រឡាញ់វិស័យសិល្បៈ និងចង់ផលិតខ្សែភាពយន្តបម្រើអារម្មណ៍ទស្សនិកជន តែខ្លួនមិនមានទុនគ្រប់គ្រាន់ធ្វើឲ្យផលិតករលោក ហ៊ុយ យ៉ាឡេង សម្រេចចិត្តខ្ចីលុយគេមកផលិតភាពយន្តរឿង "វិកលចរិត" តែទីបំផុតធ្វើឲ្យលោកអស់សង្ឃឹមជាខ្លាំង នៅពេលខ្សែភាពយន្តមួយនេះចាក់បញ្ចាំងត្រូវខាត ត្រូវលក់ឡាន និងម៉ូតូ សងបំណុលគេ រហូតធ្លាក់ខ្លួនមកជិះកង់ ដែលធ្វើឲ្យអ្នកសិល្បៈជាច្រើនបង្ហាញការអាណិតអាសូរដល់រូបលោក។ យ៉ាងណាមិញលោក សុវណ្ណ រិទ្ធី ហៅ តាវិទ័រ ក៏បានផ្ញើសារលើកទឹកចិត្តលោក ហ៊ុយ យ៉ាឡេង អានហើយស្ទើរស្រក់ទឹកភ្នែក។
ខាងក្រោមនេះគឺជាសាររបស់លោក សុវណ្ណ រិទ្ធី ដែល Kqube.net បានចំលងមកផ្សាយទាំងស្រុង "ក្នុងនាមខ្ញុំជាផលិតករ...បងយ៉ាឡេងជាទីរាប់អាន! ខ្ញុំយល់ពីអារម្មណ៍បងតាមរយៈព័ត៌មានសង្គម។ តែខ្ញុំសុំបងកុំអស់ សង្ឃឹម បងត្រូវក្រោកឡើងសម្លឹងទៅមុខ ព្រោះបងមិនសាបសូន្យនោះទេ។សម្រាប់ខ្ញុំបងនៅតែជាឈើខ្លឹមដដែល បងមិនទាន់អស់ទេ ព្រោះវិជ្ជាជីវៈ បងវាជារបស់បង បងអាចកែច្នៃបន្តទៀតបាន ដើម្បីតម្រូវចិត្តអ្នកញ៉ាំ។ បងចេះផ្សំគ្រឿងហើយតើ ទៅខ្វះអីសាច់ និងបន្លែនោះ។ បង! គ្មានដើមឈើ ធំខ្ពស់ណាមួយ ដែលមិនទទួលរងនូវកម្លាំងខ្យល់បក់បោកនោះទេ។ ខ្ញុំជូនពរបងមាន សុខភាពល្អ"។
ជាមួយគ្នានេះលោក សុវណ្ណ រិទ្ធី ក៏បានបញ្ជាក់បន្ថែមជាមួយ Kqube.net នៅមុននេះបន្តិចថា "គោលបំណងដែលខ្ញុំផ្ញើសារទៅបង ហ៊ុយ យ៉ាងឡេង គឺខ្ញុំចង់លើកទឹកចិត្តឲ្យគាត់កុំអស់សង្ឃឹម និងសុំកុំឲ្យគាត់មិនសប្បាយចិត្តចំពោះអ្នកណាម្នាក់ គឺត្រូវបន្តកែច្នៃចំណេះវិជ្ជាដែលខ្លួនមានតម្រូវទៅតាមទីផ្សារដែលអតិថិជនកំពុងត្រូវការ។ ការសិក្សាចំណុចទាំងនេះបានច្បាស់ នោះហើយជាផ្លូវនាំយើងទៅរកភាពជោគជ័យ គួបផ្សំជាមួយការតស៊ូមិនបោះបង់ការងារនោះចោលទាំងកណ្ដាលផ្លូវ"៕
ផ្តល់សិទ្ធិដោយ៖KQUBE
