ខេត្តមណ្ឌលគិរី៖ ក្មេងប្រុសអាយុ២ឆ្នាំ ដែលរងទារុណកម្មពីសំណាក់ជនដៃដល់ខ្ទើយជនជាតិវៀតណាមនោះ នៅព្រឹកថ្ងៃទី០៨ ខែធ្នូ ឆ្នាំ២០១៦នេះ រូបគេបានធូរស្បើយនឹងអាចលេខបានខ្លះនិងអាចញ៉ាំបាយបានតិចៗវិញហើយ។ នេះបើតាមលោក ខឿន សូរ ត្រូវជាឪពុកបង្កើតក្មេងប្រុសរងគ្រោះឈ្មោះ សូរ សៅ បានប្រាប់ ខេឃ្យូប នៅមុនបន្តិចនេះ។
លោក ខឿន សូរ បញ្ជាក់ប្រាប់ទៀតថា ក្រុមគ្រួសាររបស់លោកចំនួន៤នាក់កំពុងតែមករាជធានីភ្នំពេញជាមួយកុមាររងគ្រោះ ព្រមទាំងតំណាងអង្គការ CPU នៅថ្ងៃនេះ ដើម្បីពិនិត្យមើលសុខភាព កុមារា សូរ សៅ នៅមន្ទីរពេទ្យរ៉ូយ៉ាល់ភ្នំពេញ ប៉ុន្តែមិនថា នឹងមកដល់ម៉ោងប៉ុន្មាននោះទេ។លោកបន្តថា កាលពីល្ងាចថ្ងៃម្សិលមិញ និងព្រឹកមិញ លោកបានទទួលអំណោយមួយចំនួនពីសប្បុរសជន ហើយក្នុងនោះក៏ទទួលបានអំណោយពីសម្ដេចកិត្តិព្រឹទ្ធបណ្ឌិត ប៉ុន រ៉ានី ហ៊ុនសែន ផងដែរ នូវគ្រឿងឧបភោគ ដូចជា អង្គរមួយបាវ មី ទឹកត្រីនិងសម្ភារផ្សេងៗទៀត អមដោយទឹកប្រាក់ ២ លានរៀល។
គួររំឭកផងដែរថា ខ្ទើយជាជនជាតិវៀតណាមដែលបានធ្វើទារុណកម្មដោយប្រើវិធីឆក់ ទៅលើកុមារអាយុ២ឆ្នាំម្នាក់ នៅស្រុកពេជ្រាដា ហើយរត់គេចខ្លួននោះ មកដល់យប់ថ្ងៃទី០៧ ខែធ្នូ ម្សិលមិញនេះ ត្រូវបានសមត្ថកិច្ចចាប់ខ្លួនបាននៅទីក្រុងហូជីមិញ ប្រទេសវៀតណាម ហើយបញ្ជាក់ប្រាប់ថា មាន ឈ្មោះ យុង ថាញ់ ។
ហេតុការណ៍ធ្វើទារុណកម្មទៅលើកុមារអាយុ២ឆ្នាំឈ្មោះ សូរ សៅ ជាកូនជនជាតិខ្មែរដែលរស់នៅភូមិ ពូក្រូច ឃុំស្រែអំពូម ស្រុកពេជ្រាដា ខេត្តមណ្ឌលគិរី ដោយឪពុកម្តាយជាកម្មករចាំចំការកាកាវ ឲ្យជនជាតិហូឡង់នោះ កើតឡើងតាំងពីជាង២ខែមុនមកម្ល៉េះ ប៉ុន្តែទើបតែបែកធ្លាយនៅប៉ុន្មានថ្ងៃនេះ ក្រោយពីមានការបញ្ចេញ Video តាមបណ្ដាញសង្គម ហ្វេសប៊ុក ធ្វើឲ្យប្រជាពលរដ្ឋខ្មែរប្រតិកម្មនឹងអំពើអមនុស្សធម៌នេះយ៉ាងខ្លាំង៕
ផ្ដល់សិទ្ធិដោយ៖KQUBE
