
សិល្បៈ ៖ ថ្មីនេះៗតារាចម្រៀង Original Song ម៉ា ច័ន្ទបញ្ញា បានបង្ហាញរូបថតស្និទ្ធស្នាលជាមួយនារីរូបស្រស់ម្ដងរួចមកហើយ ។ ការបង្អួតរូបថតស្រីស្រស់រូបនេះ ទោះជាលោកមិនបានបញ្ជាក់ប្រាប់ពីទំនាក់ទំនងស៊ីជម្រៅក្ដី ក៏ធ្វើឲ្យអ្នកគាំទ្រជាច្រើនយល់ថា នាងម្នាក់នេះគឺជាអ្នកពិសេសរបស់លោក ។ ជាក់ស្ដែងពេលនេះលោក ម៉ា ច័ន្ទបញ្ញា ក៏បានចេញសារ និងបញ្ជាក់បន្ថែមដោយផ្ទាល់មាត់ថា នារីរូបស្រស់ម្នាក់នេះ គឺជាគូស្នេហ៍របស់លោកដូច្នេះហើយនារីផ្សេងទៀតដែលមានចិត្តមកលើតារាចម្រៀងរូបសង្ហាម្នាក់នេះពិតជាខកចិត្តមិនតិចនាក់ទេ ក្រោយពីបានអានអត្ថបទនេះរួច។
ខាងក្រោមនេះគឺជាសាររបស់លោក ម៉ា ច័ន្ទបញ្ញា ដែល Kqube.net បានដកស្រង់ទាំងស្រុង "ដំបូងបងទម្លាប់នៅម្នាក់ ឯង ហើយបន្ទាប់មក បងក៏ទម្លាប់បាត់អូនមិនបាន តែពេលខ្លះបងក៏ព្យាយាមទម្លាប់ ស្មោះត្រង់នឹងអូន ទោះគ្មានអូននៅជិត ហើយគ្រប់យ៉ាងនៃជីវិតរបស់បងបានក្លាយជាទម្លាប់មួយដែលគ្មានអូនមិនបាន។ បងនៅតែជឿថា បើពួកយើងពិតជាស្រឡាញ់ គ្នា គ្មានអ្វីដែលអាចរារាំងយើងបានទេ សូម្បីតែមនុស្ស ពេលវេលា និងភាពនៅឆ្ងាយពីគ្នា។ការស្រឡាញ់គឺការជឿជាក់ បើទោះបីជា ពេលខ្លះ ការស្រឡាញ់បានធ្វើឲ្យយើងចេះតែប្រចណ្ឌគ្នា បារម្ភគ្នា នឹកគ្នា ឬឈ្លោះគ្នា ម្ដងម្កាលក៏ដោយ ក៏បងសង្ឃឹមថា អូនក៏មានទម្លាប់បាត់បងមិនបានដូចគ្នា។ សូមទេវតាជួយថែពួកយើងទាំងពីរផង"។
ផ្ដល់បទសម្ភាសន៍ជា Kqube.net ជុំវិញការចេញសារខាងលើនេះលោក ម៉ា ច័ន្ទបញ្ញា បានសារភាពថា លោក និងនារីដែលបានផុសក្នុងហ្វេសប៊ុកជាមួយគ្នានោះពិតជាមានទំនាក់ទំនងស្នេហានឹងគ្នាពិតមែន គឺគាត់ឈ្មោះ អ៊ិញ ហើយគាត់ក៏ជាតារាសម្ដែងទើបចូលប្រឡូកអាជីពសិល្បៈបានរយៈពេលជិតមួយឆ្នាំទេ។ លោក ម៉ា ច័ន្ទបញ្ញា បន្តថា លោកបានស្គាល់គ្នាជាមួយសង្សារមានរយៈពេលប្រមាណជាកន្លះឆ្នាំមកហើយ ប៉ុន្តែពួកយើងទើបស្រឡាញ់គ្នាមានរយៈពេលប្រមាណជាបីខែមកទេ។
បញ្ជាក់បន្ថែមជាមួយ Kqube.net ពីចំណងស្នេហ៍គ្រាដំបូងនេះលោក ម៉ា ច័ន្ទបញ្ញា បានប្រាប់ទៀតថា ការស្រឡាញ់រវាងរូបលោក ជាមួយសង្សារទោះជាស្នេហាវ័យក្មេង ប៉ុន្តែពួកយើងស្រឡាញ់គ្នាស្មោះ នឹងមានចាស់ទុំទាំងសងខាងដឹងឮ ហើយនៅពេលនេះទោះជាយើងមិនទាន់គិតគួររៀបចំអនាគត ប៉ុន្តែពួកយើងនឹងចាប់ដៃគ្នាកសាងគ្រួសារតូចមួយនៅពេលខាងមុខដ៏ពិតប្រាកដ៕




ផ្ដល់សិទ្ធិដោយ៖KQUBE