√ ពីកម្មករលាងឡាននៅត្រឡោកបែក ក្លាយជាអគ្គនាយកក្រុមហ៊ុន

ជីវិតជោគជ័យ៖ "ការចាប់ផ្ដើមអាជីវកម្មមួយចេញពីជំនាញ ដែលខ្លួនចេះច្បាស់ និងស្ទាត់ជំនាញ គឺអត្រាជោគជ័យក្នុងអាជីវកម្មនោះ មានរហូតដល់ទៅ៨០ភាគរយ" នេះជាការលើកឡើងរបស់លោក សំ ទេត្រា ប្រធានក្រុមហ៊ុនចែកចាយបរិក្ខារពេទ្យ MEES ផ្ដល់បទសម្ភាសន៍ផ្ដាច់មុខដល់គេហទំព័រព័ត៌មាន KQube.Net នាពេលកន្លងមក។

ក្រោយពេលបានអានសេចក្ដីផ្ដើមខាងលើនេះមិត្តអ្នកអាន ប្រហែលជាចាប់អារម្មណ៍ពីជីវប្រវត្តិផ្ទាល់ខ្លួនរបស់ប្រធានក្រុមហ៊ុនខាងលើជាមិនខាន ដូច្នេះគេហទំព័រព័ត៌មាន KQube.Net សូមសង្ខេបខ្លះៗនូវជីវប្រវត្តិរបស់លោក ជូនមិត្តអ្នកអានដើម្បីទុកជាការដកបទពិសោធន៍ ទុកជាទុនសម្រាប់ដាំដុះនូវអាជីវកម្មរបស់លោកអ្នក។

ជីវប្រវត្តិសង្ខេប និងការអភិវឌ្ឍន៍ខ្លួន

លោក សំ ទេត្រា កើតក្នុងឆ្នាំ១៩៧៥ នៅស្រុកឈូក ខេត្តកំពត និងជាកូនច្បងស្ថិតនៅក្នុងចំណោមបងប្អូន៥នាក់។ លោកជាកូនអ្នកស្រែសុទ្ធសាធ ដែលឪពុកជាអ្នកធ្វើស្រែ និងម្ដាយរកស៊ីភ្ញាស់ពងទាកូន ដ៏ក្រីក្រជាងគេក្នុងភូមិរបស់លោក។ នៅឆ្នាំ១៩៩៣ ក្រោយពីលោកបានប្រឡងបាក់ឌុបក្នុងចំណាត់ថ្នាក់ល្អ លោកបានសម្រេចចិត្តធ្វើដំណើរផ្សងព្រេងពីស្រុកមកប្រឡង និងរកការងារធ្វើនៅភ្នំពេញ។

ដើម្បីសន្សំលុយរៀន ការងារទី១ លោកបានធ្វើ គឺជាកម្មករលាងឡាននៅម្តុំត្រឡោកបែក ដល់ឆ្នាំ១៩៩៤ លោកបានចូលរៀននៅវិទ្យាស្ថានបច្ចេកវិទ្យាកម្ពុជា (តិចណូ) ដោយទទួលបានប្រាក់ឧបត្ថម្ភ៥០ដុល្លារក្នុង១ខែ។ នៅឆ្នាំសិក្សាទី២ លោកក៏បាន ចាប់ផ្ដើមអាជីពជាជាងតភ្លើងតាមផ្ទះ ដើម្បីរកប្រាក់ចិញ្ចឹមជីវភាព និងផ្ញើឲ្យលោកឪពុកអ្នកម្ដាយនៅឯស្រុកកំណើត។

មិនយូរប៉ុន្មានដោយសារមាននិស្ស័យនឹងគ្រឿងអគ្គិសនី និងឧបករណ៍អេឡិចត្រូនិក លោកបានចាប់ផ្ដើម ក្លាយជាជាង ជួសជុលឧបករណ៍អេឡិចត្រូនិក ដូចជា វិទ្យុ ទូរទស្សន៍ជាដើម។ ក្រោយមកទៀត ដោយបានទទួលចំណេះដឹងពីសាលារួមផ្សំ និងការអនុវត្តន៍នៅខាងក្រៅផងនោះ គាប់ជួននៅអំឡុងពេល ដែលកម្ពុជាទទួលបានជំនួយខាងវិស័យសុខាភិបាលជាច្រើន ពិសេសគឺឧបករណ៍ពេទ្យ ទាំងថ្មី និងប្រើប្រាស់រួចនៅស្រុកគេ ។

ឧបករណ៍ទាំងនោះមានខ្លះនៅល្អ អាចនៅប្រើប្រាស់បាន និងខ្លះខូចបន្តិចបន្តួច ប៉ុន្តែពិបាករកជាងធ្វើដោយសារនៅកម្ពុជា នៅពេលនោះមិនទាន់មានជាងជំនាញដូចបច្ចុប្បន្ននៅឡើយ ។ កត្តានេះបានជំរុញឲ្យលោកចាប់ផ្ដើម សិក្សានិងស្វែងយល់ពីគ្រឿងបរិក្ខារទាំងនោះ ព្រមទាំងទទួលបានការបង្ហាត់បង្ហាញពីរៀមច្បងម្នាក់ផងដែរ។ ដោយសារស្នាដៃ និងភាពស្មោះត្រង់ប្ដូរផ្ដាច់ អស់ពីបេះដូងចំពោះម៉ាស៊ីនដែលភ្ញៀវប្រគល់ឲ្យនោះ កេរ្តិ៍ឈ្មោះរបស់លោកត្រូវបានទទួលស្គាល់ និងល្បីល្បាញ មួយ អន្លើ។

គំនិតសហគ្រិនលេចធ្លោឡើង បន្ទាប់ពីក្លាយជាអ្នកជំនាញ។ នៅឆ្នាំ២០០០ ដើម្បីបង្កើនជាទំនុកចិត្តដល់អ្នករកសេវាជួសជុលពីលោក លោកក៏សម្រេចចិត្តជួលផ្ទះមួយតម្លៃ ១៧០ដុល្លារ នៅម្ដុំសន្ធរម៉ុកដើម្បីជួសជុលម៉ាស៊ីនទាំងនោះជាផ្លូវការ។ ប៉ុន្តែមិនយូរប៉ុន្មានដោយមើលឃើញជីវភាពប្រជាជន ពិសេសពេទ្យឯកជនជាច្រើនហាក់មានការកើនឡើង និងចង់ដឹងពីម៉ាស៊ីនប្រភេទថ្មីៗ លោកក៏ចាប់ផ្ដើមសន្សំលុយសម្រាប់បង្វិលបង្គ្រប់ក្នុងការនាំចូល ម៉ាស៊ីនថ្មីមកលក់ជូនដល់អតិថិជន។

នៅក្មេងខ្ចីផងនោះ អំឡុងឆ្នាំ២០០៤ លោកក៏សម្រេចចិត្តបើកក្រុមហ៊ុនមួយមានឈ្មោះថា Medical Equipments Electronic Service ដែលត្រូវបានគេស្គាល់ថា MEES ជាផ្លូវការដើម្បីបំពេញតាមតម្រូវការ ប៉ុន្តែអ្វីដែលគេជឿជាក់ គឺលើរូបលោកដែលធានាលើសេវាជួសជុលដល់អតិថិជន។

នៅឆ្នាំ២០០៦ឈានដល់ដំណាក់កាលប្រកួតប្រជែង លោកបានរកដៃគូចូលរួមទុនមកពីហុងកុង ដើម្បីងាយស្រួលក្នុងការ ធ្វើការកុងត្រានាំផលិតផលចូលមកកាន់ទីផ្សារកម្ពុជា ។ នៅឆ្នាំ២០១០ ក្រុមហ៊ុនរបស់លោកបានដំណើរការល្អ ឃើញថាគ្មានអ្វីជាក្ដីបារម្ភទៀតឡើយ លោកក៏បន្តបើកក្រុមហ៊ុនសូឡាហូម (Sola Home) មួយទៀត ដែលជាក្រុមហ៊ុនផ្គត់ផ្គង់ និងរៀបចំអគ្គិសនីប្រើប្រាស់ពន្លឺព្រះអាទិត្យ។

ជោគជ័យ៨០ភាគរយបើអ្នកចាប់ផ្ដើមអាជីវកម្មដែលចេញពីជំនាញខ្លួនឯង បកស្រាយជុំវិញការអះអាងខាងលើនេះ លោក សំ ទេត្រា បានបញ្ជាក់ក្នុងចំណោមចំណុចៗខាងក្រោមនេះថា៖

ជំនាញសំខាន់ជាងលុយដើមទុនទៅទៀត

មនុស្សមួយចំនួនតែងតែរអ៊ូរទាំថា មុននឹងរកស៊ីកើតទាល់តែមានលុយ មានដើមទុន ទាំងមិនដឹងថា ខ្លួនចង់រកស៊ីអី ជំនាញអីនោះផង លោកធ្លាប់ឃើញអ្នកមានលុយខ្លះ ខិតខំបើកហាង ចំណាយដើមរ៉ាប់ម៉ឺនដុល្លារ បើកន្លែងរកស៊ីមួយយ៉ាងធំដុំ ប៉ុន្តែហាងនោះបើកបានមួយពព្រិចភ្នែកក៏បិតទៅវិញ ដោយសារមានលុយតែជំនាញមានភាពមិនច្បាស់លាស់។

ដូច្នេះសំខាន់ណាស់ ការរកស៊ីត្រូវជាមួយជំនាញរបស់ខ្លួនឯង ព្រោះគ្រប់អាជីវកម្មទាំងអស់ យើងធ្វើបាន គេក៏ធ្វើបាន ហើយបើសិនជាជំនាញយើងខ្សោយជាងគេដៃគូប្រកួតប្រជែងរបស់យើង គេនឹងវ៉ៃយើងដួលមិនខានឡើយ ប៉ុន្តែបើយើងមានដើមទុនល្អ ហើយជំនាញច្បាស់លាស់ទៀត មានអ្វីត្រូវបរាជ័យ។

ស្វែងរកចំណុចពិសេសរបស់ខ្លួន ឈរនៅលេខរៀងទី១ក្នុងបេះដូងអតិថិជន

ការបើកអាជីវកម្មមួយចាំបាច់ណាស់ ត្រូវមានជំនាញច្បាស់លាស់ ដែលអាចជួយដោះស្រាយឲ្យអតិថិជនគ្រប់បញ្ហា គឺធ្វើយ៉ាងណាឲ្យការផ្ដល់សេវារបស់ខ្លួនទៅកាន់អតិថិជនល្អបំផុត នៅពេលនោះ អតិថិជននឹងចងចាំយើងមិនខាន។ ពេលដែលគេទៅដល់ណា គេនឹងរឭកពីយើងនៅទីនោះ និងជួយផ្សព្វផ្សាយឲ្យយើង ដោយចេញពីបេះដូងរបស់គេតែម្ដង។

ការធ្វើបែបនេះបាន ពេលនោះក្នុងចំណោមអ្នកលក់(Supplier) ១០នាក់ យើងត្រូវឈរនៅលេខរៀងទី១ បើបងប្អូនឬមិត្តភ័ក្ដិគេ មានបញ្ហានឹកឃើញយើងមុនគេ ឬលុះត្រាតែទាក់ទងយើងមិនបាន រកយើងមិនឃើញ ទើបគេរកអ្នកថ្មី ។ ប៉ុន្តែរកអ្នកថ្មីនោះក៏នៅតែចង់រកយើងវិញដែរ តាមរយៈការផ្ដល់សេវាជាទីពេញចិត្តនេះឯង។

ឧទាហរណ៍៖ សម្រាប់លោកផ្ទាល់គឺចេញពីជាងជួសជុលឧបករណ៍ពេទ្យ ដែលគេអាចជឿទុកចិត្តបាន ដូច្នេះពេលលោកសម្រេចចិត្តនាំផលិតផលបរិក្ខារពេទ្យមកលក់នោះ សំនួរទី១ដែលអតិថិជនសួរនោះ គឺបើខូចអាចជួសជុលបានទេ មានគ្រឿងបន្លាស់ទេ ទោះបីជាគេមិនស្គាល់ម៉ាកផលិតផលក៏ដោយ គឺគ្រាន់តែលោកឆ្លើយថា បានគឺគេសម្រេចចិត្តទិញភ្លាមដោយមានទំនុកចិត្តបំផុត ។

គំនិតខុសរបស់យុវជនមួយចំនួននាពេលបច្ចុប្បន្ន

"ចង់ធ្វើការស្រួលៗ បានលុយច្រើនៗ ក្លាយជាអ្នកមានឆាប់រហ័ស" គ្មានទេការងារបែបនេះ បើចង់ក្លាយជាអ្នករកស៊ី ត្រូវដឹងថា ក្នុងដំណាក់កាលដំបូង ត្រូវបំភ្លេចចោលនូវទម្លាប់ដើរលេងសប្បាយ នៅខាងក្រៅ ទុកវាមួយឡែកសិន គឺត្រូវតែផ្ដោតជាមួយអាជីវកម្មរបស់យើងមួយនោះ ត្រូវគិតហើយ គិតទៀត ទោះបីជាពេលសម្រាកក៏ដោយ យើងមិនបានធ្វើវាភ្លាមៗ ក៏ត្រូវតែខំគិតឲ្យអស់លទ្ធភាព។ ពេលនោះ យើងនឹងរកឃើញមធ្យោបាយ ចំណុចល្អសម្រាប់អភិវឌ្ឍន៍ លើអាជីវកម្មរបស់យើងជាមិនខាន។ ដូច្នេះយុវជនត្រូវគិតថា បើខំប្រឹងធ្វើ១០ហើយ មិនជោគជ័យត្រូវខំធ្វើឲ្យបាន២០ បើ់មិនជោគជ័យទៀត ត្រូវធ្វើបន្ថែមទៀត រហូតដល់ជោគជ័យ។

លោកបានប្រៀបធៀបការរកស៊ីទៅនឹងការដាក់ដីក្នុងធុងមួយ ធ្វើយ៉ាងណាដាក់ឲ្យបានច្រើន និងហាប់ណែនអស់ពីលទ្ធភាព ដូច្នេះជំហានដំបូង គឺយកដុំដីធំៗ មកដាក់ បន្តបន្ទាប់ឲ្យពេញ ហើយទើបរើសយកដុំតូចៗមកដាក់បន្ថែមតាមចន្លោះ បន្ទាប់មកទៀត យកដុំគ្រោះតូចៗមក ញាត់បញ្ចូលតាមប្រហោងតូចៗ។ បន្ទាប់មកទៀតយកខ្សាច់មករោយរហូតដល់ពេញធុង ប៉ុន្តែពេលនេះមិនទាន់ហាប់នៅឡើយទេ គឺត្រូវយកទឹកមកស្រោចទៀត ដើម្បីឲ្យកាន់តែហាប់។

អាជីវកម្មក៏ដូចគ្នា ម្ចាស់អាជីវកម្មត្រូវតែគិតពីចន្លោះប្រហោង ធ្វើយ៉ាងណាឲ្យអាជីវកម្មរបស់ខ្លួនល្អគ្មានចន្លោះប្រហោង មិនឲ្យដៃគូប្រកួតរបស់យើងអាច មានឱកាស ឆក់យកអតិថិជនរបស់យើងបានឡើយ ។

ការផ្ដាំផ្ញើ"ចេះអ្វីចេះឲ្យប្រាកដ"

លោក សំ ទេត្រា ៖ " ជាច្រើនឆ្នាំហើយដែលខ្ញុំគ្រប់គ្រងក្រុមហ៊ុន អ្វីដែលខ្ញុំជួបប្រទះគឺ ជួបបុគ្គលិកខ្លះពេលគាត់និយាយ អ្វីក៏គាត់ចេះ គាត់អាចធ្វើបានដែរ មានន័យថាគាត់ចេះគ្រប់មុខ តាំងពីតភ្លើង ជួសជុលអ្វីផ្សេងៗ តកាមេរ៉ាសុវត្ថិភាពជាដើម ប៉ុន្តែរកមួយណាឲ្យមានជំនាញច្បាស់ ឲ្យប្រាកដប្រជាអត់មានទេ ដូច្នេះពេលធ្វើអ្វីមួយស៊ីជម្រៅ គឺគាត់ធ្វើមិនបាននោះឡើយ "។

ដូច្នេះសូមឲ្យប្អូនៗបើចង់ជោគជ័យ សូមផ្ដោតជាមួយនឹងអាជីព ឬ ជំនាញណាមួយឲ្យបានប្រាកដប្រជា និងច្បាស់លាស់ សូម្បីភាសាបរទេសក៏ដោយ មិនបាច់ចេះច្រើនភាសាទេ សំខាន់ចេះនិយាយភាសាណាមួយឲ្យច្បាស់ ទាំងសរសេរ និងនិយាយ អាចប្រើប្រាស់ជាផ្លូវការបាន សម្រាប់ធ្វើពាណិជ្ជកម្មជាមួយបរទេសតែម្ដង ។ ភាពច្បាស់លាស់គឺជាទុនមួយ ដែលមិនអាចខ្វះបានក្នុងអាជីវកម្មតែម្ដង៕