√ អាណិតស្ត្រីមេម៉ាយកូន០៣ គ្មានទីពឹងហើយ...អកុសលមានអ្នកឃុបឃិតយកដីកេរមរតក ទៀត !!

ខេត្តកោះកុង៖ មានព័ត៌មានបែកធ្លាយរឿងស្ត្រីមេម៉ាយម្នាក់កូន៣នាក់ក្នុង បន្ទុករស់នៅយ៉ាងលំបាកអាស្រ័យលើដីភូមិ និង ដីស្រែដែលជាកេរមរតកពីឪពុកទំហំ៥០ម៉ែត្រគុណនឹង៦០ម៉ែត្រ ប្រឈមនឹងការរឹបអូសយកដោយជនឱកាសនិយមឃុបឃិតជាមួយអាជ្ញាធរមូលដ្ឋាន បើពុំមានការជួយជ្រោមជ្រែងដល់ម្ចាស់អចលនទ្រព្យ តាមផ្លូវច្បាប់ត្រឹមត្រូវទេនោះ ។

លោកស្រី វ៉ាន់ ធួន ស្រ្តីមេម៉ាយក្រក្រីមានកូន៣នាក់តូចៗក្នុងបន្ទុក រស់នៅក្នុងភូមិវាលត្បូង ឃុំស្រែអំបិល ស្រុកស្រែអំបិល ខេត្តកោះកុង អង្គុយរៀបរាប់បណ្ដើរ លាយលាំនឹងការយំខ្សឹបខ្សួលបណ្ដើរ ដង្ហោយរកជំនួយតាមផ្លូវច្បាប់ ក៏ដូចជាការជួយជ្រោមជ្រែងដោះស្រាយរឿងដីកេររបស់គាត់ ដែលជនឱកាសនិយមប៉ុនប៉ងរឹបអូសយក ខណៈរូបគាត់បានជំពាក់ប្រាក់គេត្រឹមតែ៥០០ដុល្លារ ។

ស្រ្តីមេម៉ាយដ៏កំសត់រូបនេះ បានរៀបរាប់ដំណើររឿងពិតថា កាលពីឆ្នាំ ២០១១ ខែវិច្ឆិកា គាត់និងប្ដីបានទៅខ្ចីប្រាក់កាសធ្វើដើមទុនពីធនាគារ អេស៊ីលីដា ចំនួន ២,៧៣២,០០០៛(ពីរលានប្រាំពីរសែន បីម៉ឺន ពីរពាន់រៀល) ដើម្បីចិញ្ចឹមជ្រូក និង ទិញម៉ាស៊ីនទូកនេសាទ ។ សំណាងអាក្រក់ជ្រូកដែលបានចិញ្ចឹមនោះងាប់អស់ ម៉ាស៊ីនទូកនេសាទក៏ខូចខាតអស់ ហើយកូនប្រុសម្នាក់ធ្លាក់ខ្លួនឈឺធ្ងន់ធ្ងរ ប្ដីក៏ស្លាប់ចោល ដូចនេះប្រាក់កាសមានប៉ុន្មានមើលជម្ងឺកូន,និងបុណ្យសពប្ដីគ្មានសល់ទេ។

លោកស្រីបន្តថា ដើម្បីដោះទ័លពួកគាត់បានសម្រេចចិត្តទៅខ្ចីលុយពីស្ថាប័នមីក្រូហិរញ្ញវត្ថុផ្សេងៗទៀតយកទៅសងធនាគារអេស៊ីលីដា ។ ការសងនោះបានតែបន្តិចបន្ទួចប៉ុណ្ណោះព្រោះត្រូវចាយវាយប្រចាំថ្ងៃផង ធ្វើឱ្យបំណុលកាន់តែច្រើនឡើង ក៏ចេះតែដើរខ្ចីពីមួយទៅសងមួយទោះការប្រាក់ខ្ពស់ក៏ដោយអោយតែបាន រហូតឡើងដល់ចំនួន ៨,៧៣២,១០០៛(ប្រាំបីលាន ប្រាំពីរសែន បីម៉ឺន ពីរពាន់មួយរយរៀល) ។

សំណាងអាក្រក់មួយទៀតបានកើតឡើងចំពោះគ្រួសារគាត់ គឺប្ដីរបស់បានស្លាប់ដោយក្រឡាប់ឡានខណៈធ្វើដំណើរទៅស៊ីឈ្នួលកាប់អំពៅឱ្យក្រុមហ៊ុនស្ករអំពៅរបស់ ឧកញ៉ា លី យ៉ុងផាត់ កាលពីថ្ងៃទី ០៤ ខែ មករា ឆ្នាំ ២០១៦ ជាហេតុធ្វើឱ្យជនឱកាសនិយមម្នាក់ក្នុងចំណោមម្ចាស់បំណុលទាំងអស់ បានឃុបឃិតជាមួយអាជ្ញាធរមូលដ្ឋានធ្វើលិខិតផ្ទេរសិទ្ធិកាន់កាប់ដីកេររបស់គាត់ បំណងរឹបអូសយក ។ ហើយសព្វថ្ងៃម្ចាស់បំណុលរូបនេះបានដាក់ពាក្យប្ដឹងទៅតុលាការ និង អធិការស្រុកស្រែអំបិលតែងព្យាយាមកោះហៅស្រ្តីមេម៉ាយទៅបំភ្លឺមួយលើកជាពីរលើក ប៉ុន្តែស្រ្តីមេម៉ាយមិនហ៊ានទៅព្រោះខ្លាចគេបណ្ដេញចេញពីភូមិដ្ឋាន និង ចាប់ដាក់ឃ្នោះឃ្នាង ។ ស្រ្តីមេម៉ាយក្រក្រី លោកស្រី វ៉ាន់ ធួន បានបន្ថែម ។

លោកស្រី វ៉ាន់ ធួន គួរបញ្ជាក់ថា ម្ចាស់បំណុលមាន(ប្រាំមួយនាក់)
១-ធនាគារ អេស៊ីលីដា ចំនួន ២,៧៣២,១០០៛
២-លោកសូរ គន្ធ និង លោកស្រី ហ៊ាន ផល្លី ចំនួន ២,០០០,០០០៛
និងម្ចាស់បំណុលបួននាក់ទៀត ក្នុងម្នាក់អោយខ្ចីចំនួន ១,០០០,០០០៛

អ្នកភូមិផងរបងជាមួយបានប្រាប់អ្នកសារព័ត៌មានថា សំណាងល្អម្យ៉ាងដែរដែលបានធនាគារអេស៊ីលីដា រក្សាប្លង់កម្មសិទ្ធិដីទាំងនេះទុក ហើយធនាគារក៏មិនមានបំណងរឹបអូសឬធ្វើការគាបសង្កត់អ្វីទេ គឺទុកឱកាសអោយរហូតមក៕