ខេត្តកោះកុង៖ នៅវេលាព្រឹកថ្ងៃទី១២ធ្នូ២០១៦នេះ ដោយស្ត្រីម្នាក់ត្រូវបានសមត្ថកិច្ចថៃចាប់ខ្លួនខណៈ សុីឈ្នួលអូសរទះដឹកទំនិញជនបរទេស តាមប្រភពឲ្យដឹងថា មុនពេលកើតហេតុ នៅព្រឹកថ្ងៃទី៩ ខែធ្នូ ឆ្នាំ២០១៦ មានបរទេសម្នាក់ ជនជាតិ រ៉ូស្សី ឈ្មោះ GARASHCHENKO ANDREY ឆ្នាំកំណើតថ្ងៃទី១៩ ខែធ្នូ ឆ្នាំ១៩៨៨ កាន់លិខិតឆ្លងដែន លេខ៧១៥៦៥៣៥៩៩ ធ្វើដំណើរឆ្លងដែន ចេញពីប្រទេសកម្ពុជា ចូលទៅប្រទេសថៃ តាមច្រកទ្វាអន្តរជាតិចាំយាម ខេត្តកោះកុងនិងខេត្តត្រាត ពេលទៅដល់មុខប៉ុស្តិ៍ត្រួតពិនិត្យភាគីកម្ពុជា ជនបរទេសរូបនេះ បានជួលរទេសរុញ ដើម្បីដឹកវ៉ាលីរបស់ខ្លួនឆ្លងកាត់ប៉ុស្តិ៍ត្រួតពិនិត្យទាំង២ភាគី ពេលចូលទៅប៉ុស្តិ៍ត្រួតពិនិត្យ ភាគីថៃ សមត្ថកិច្ចគយថៃ ក៏ឆែកឆេររកឃើញគ្រឿងញៀន នៅពេលនោះជនបរទេស ដែលជាម្ចាស់វ៉ាលី ឈរមើលពីចំងាយ ឃើញសមត្ថកិច្ចគយថៃឆែកវ៉ាលី របស់ខ្លួនដែលនៅក្នុងរទេសរុញ ក៏ត្រឡប់ក្រោយចូលមកកម្ពុជាវិញបាត់តែម្ដង។
ប្រភពឲ្យដឹងទៀតថា ពេលនោះ រយៈពេលប្រហែជា២០នាទី ភាគីថៃ ក៏ហៅមន្ត្រីការិយាល័យ BLO ទៅសហការ ដើម្បីតាបចាប់មេក្លោង ជាជនបរទេស។ ភ្លាមៗនោះមន្ត្រីការិយាល័យ BLO ក៏រាយការណ៍តាមថានានុក្រម ដើម្បីចាត់វិធានការ ស្រាវជ្រាវ ស្ទាក់ចាប់ ប៉ុន្តែរហូតដល់បច្ចុប្បន្នរកពុំទាន់ឃើញនៅឡើយ។
ពេលនេះសមត្ថកិច្ចថៃ បានឃាត់ខ្លួនស្ដ្រីខ្មែរជាកម្មករឈ្មោះ ហួត សុគម (ហៅយាយគឿន) អាយុ៥៤ឆ្នាំ ទីលំនៅបច្ចុប្បន្ន ភូមិថ្មី ឃុំប៉ាក់ខ្លង ស្រុកមណ្ឌលសីមា ខេត្តកោះកុង ដោយក្នុងរទេះរុញនោះ រកឃើញ កញ្ឆាគ្រៀម ចំនួន២១កំប៉ុង ស្មើនឹង៤,២៧គីឡូក្រាម ហេរ៉ូអ៊ីន ចំនួន២១,២៩ក្រាម ឡេលាបស្បែក កំប៉ុងជ័រ ចំនួន២១កំប៉ុង។
បច្ចុប្បន្នភាគីថៃ បានកសាងសំណុំរឿង ដើម្បីចាត់ការទៅតាមនីតិវិធី នៅប្រទេសថៃ ៕
ផ្ដល់សិទ្ធិដោយ៖VD7News.com
