ភ្នំពេញ៖ កាលពីវេលាម៉ោង៥និង២០នាទីទៀបភ្លឺថ្ងៃទី១៩ ខែធ្នូ ឆ្នាំ២០១៦នេះ បងប្អូនប្រុសស្រី២នាក់ខណៈជិះម៉ូតូមកពីស្រុកទៅធ្វើការស្រាប់តែចាប់ហ្វ្រាំងបោកដួលដោយខ្លួនឯង ពេលនោះមានមនុស្សប្រុស៣នាក់រត់មកជួយ តែតាមពិតម្នាក់ក្នុងចំណោមនោះបានឆ្លៀតឱកាសលើកម៉ូតូជិះយកទៅបាត់ តាមបណ្តោយផ្លូវព្រះនរោត្តមកែងផ្លូវលេខ២១៤ នៅចំណុចមុខសាលាបឋមសិក្សាចតុមុខ សង្កាត់ជ័យជំនះ ខណ្ឌដូនពេញ ។
ប្រភពពីកន្លែងកើតហេតុឲ្យដឹងថា ជនរងគ្រោះឈ្មោះ ស៊ុត ចំណាន ភេទប្រុស អាយុ៣៤ឆ្នាំ ធ្វើការនៅសណ្ឋាគារ រ៉ូយ៉ាល់ និងប្អូនស្រីឈ្មោះ សយ អំម៉ារ៉ា អាយុ២៦ឆ្នាំ មុខរបរកម្មការិនីរោងចក្រនៅម្តុំទឹកថ្លា ទាំង២នាក់ស្នាក់នៅភូមិស្នៅកន្លែង ឃុំដីឥដ្ឋ ស្រុកកៀងស្វាយ ខេត្តកណ្តាល ។
ប្រភពបន្តថា មុនពេលកើតហេតុគាត់ជាមួយប្អូនស្រីរបស់គាត់ជានាំគ្នាជិះម៉ូតូម៉ាកហុងដាឌ្រីម ពណ៌ខ្មៅ ស៊េរី២០១៦ ពាក់ស្លាកលេខ កណ្តាល 1R-7784 ចេញពីផ្ទះនៅឯស្រុកកៀនស្វាយ គោលបំណងទៅធ្វើការ ខណៈពេលជិះមកដល់ចំណុចផ្លូវព្រះនរោត្តមកែងផ្លូវលេខ២១៤គាត់បើករឿងលឿនបន្តិច ស្របពេលនោះស្រាប់តែមានសត្វឆ្កែមួយក្បាលបានរត់កាត់ផ្លូវ ធ្វើឲ្យគាត់អកហ្ស៊ើចាប់ហ្វ្រាំងបោកដួលទាំង២នាក់បងប្អូនតែម្តង ភ្លាមៗនោះមានបុរស៣នាក់បានរត់មកជួយគាត់ ហើយក្នុងចំណោមនោះមានម្នាក់បានឆ្លៀតឱកាសលើកម៉ូតូជិះទៅបាត់ ចំណែកជនរងគ្រោះទាំង២នាក់វិញបានរងរបួសស្រាល ៕
ផ្ដល់សិទ្ធិដោយ៖VD7News.com
