√ ខាតដើមរឿង"វិកលចរិត" សល់តែកង់ជិះ ហ៊ុយ យ៉ាឡេង នៅតែសច្ចាបន្តលើវិថីភាពយន្ត

សិល្បៈ៖ ធ្លាប់ប្រឡូកក្នុងវិស័យភាពយន្តអស់រយៈពេល១៥ឆ្នាំកន្លងមក ហើយរឿងដែលលោកទទួលជោគជ័យខ្លាំងកាលពីជំនាន់មុននោះគឺរឿង "ខ្មោចដើមចេកជ្វា" ដែលបច្ចុប្បន្ននេះ ជាម្ចាស់ផលិតកម្ម មាតុចក្រ ហើយកំពុងតែបាត់បង់កម្លាំងចិត្តយ៉ាងធ្ងន់ធ្ងរ បន្ទាប់ពីលោកលះបង់សាច់ស្រស់ឈាមស្រស់ផលិតរឿង "វិកលចរិត" ដែលបរទេសសរសើរថាមានគុណភាពល្អមិនចាញ់រឿងពួកគេនោះ តែទីបំផុតម្ចាស់ផលិតកម្មបានបង្ហាញការធ្លាក់ទឹកចិត្ត ដោយសន្ទុះការគាំទ្រតិចជាងរឿងបរទេស ទៅវិញ តែទោះបីយ៉ាងណាលោក ហ៊ុយ យ៉ាឡេង នៅតែសច្ចាបន្តលើវិថីមួយនេះ។

បន្ទាប់ពីមានអារម្មណ៍មួយធេងធោង ក្រោយខាតបង់ធំរឿងខាងលើ ហើយត្រូវជាប់បំណុលគេក្នុងការចំណាយផលិតរឿងនេះ លោកហ៊ុយ យ៉ាឡេង បានបង្ហោះសារនៅលើបណ្ដាញសង្គមហ្វេសប៊ុកនៅថ្ងៃទី០៧ ខែធ្នូ ឆ្នាំ២០១៦នេះថា "សូមលើកម្រាមដៃដប់ថ្លែងអំណរគុណដល់បងប្អូនខ្មែរដែល ស្រឡាញ់គោរព និងគាំទ្រអោយតម្លៃស្នាដៃរឿងវិកលចរិតខ្ញុំបាទ! កាលពីយប់មិញខ្ញុំពិតជាធាក់កង់លេងចង់ទៅមុខមែន តែក្រោយមកដល់ផ្ទះខ្ញុំបានទទួលសារលួងលោមយ៉ាងច្រើន! ខ្ញុំរំភើបចិត្តមែនទែន! ទប់ទឹកភ្នែកមិនបាន! អានបណ្ដើរស្រក់ទឹកភ្នែកបណ្ដើរ!"

"នៅពេលចុងក្រោយនេះខ្ញុំពិតជាធ្លាក់ទឹកចិត្តមែន ចប់ការបញ្ចាំងកុននៅពេលយប់! ធាក់កង់ទាំងគ្មានកម្លាំងមក ផ្ទះជិះបណ្ដើរគិតបណ្ដើរ! ហេតុអីភាពយន្តដែលខ្ញុំបូជាស្បែក និងឈាមស្រស់ គុណភាពអាចទប់ និងបរទេស តែបែរសន្ទុះការគាំទ្រតិចជាងរឿងបរទេស! ចម្លើយស្មុគស្មាញនិងច្រើន! តែយប់មិញខ្ញុំបានចម្លើយតែមួយ! ខ្ញុំមិនឯកោទេ! ខ្ញុំបានកិត្តិយស និងក្តីស្រឡាញ់ការគោរពពីបងប្អូនខ្មែរ បន្ទាប់ពីបានទស្សនារួច! តែមិនអីទេខ្ញុំនិងស្វែងរកដំណោះស្រាយ ហើយនិងដើរលើវិថីនេះសន្យាមិនបោះបង់ឡើយ!"។

ក្រោយថ្ងៃសម្ពោធរឿងត្រូវបានបញ្ចប់លោក ធ្លាប់បានបង្ហោះសំណេរមួយ តាមបណ្តាញសង្គមហ្វេសប៊ុកដូចគ្នា ដោយលោកសរសេរថា "ធាក់កង់លេងចង់ទៅមុខហើយ! ជាង១៥ឆ្នាំហើយដែលខ្ញុំបម្រើវិស័យនេះ! ភាពនឿយហត់ការលំបាកមិនអាចទប់ស្កាត់អោយខ្ញុំបោះបង់ លើការងារនេះឡើយ! ហើយខ្ញុំក៏បានសច្ចាថានឹងបម្រើវិស័យនេះអស់មួយជីវិតដែរ!" លោកបន្តថា "តែឆ្នាំនេះ ពេលនេះហេតុអីក៏ខ្ញុំអស់កម្លាំងចិត្តម្លេះ? ភាពយន្តដែលខ្ញុំលះបង់ស្បែកឈាមស្រស់ ស្ទើរឆ្កួតម្តងៗ ពេលសម្ដែងជាតួឆ្កួត បរទេសកោតសរសើរអោយតម្លៃភាពយន្តមានកម្រិតស្តង់ដា តែទីបំផុតមានអ្នកគាំទ្រតិចជាងភាពយន្តបរទេសដែលមានគុណភាពស្មើគ្នា រឺមួយក៏គាត់ជឿជាក់តែរឿងបរទេស? "សុំមេត្តាជឿជាក់លើរូបខ្ញុំម្ដងបានទេ? សាកមើលរឿងវិកលចរិតបានទេ? ពីកូនខ្មែរម្នាក់ដែលដាក់ទុនជីវិតបម្រើវិស័យសិល្បៈខ្មែរជូនលោកអ្នក? បើសិនជាមើលហើយបងប្អូន៥០ភាគរយថាមិនល្អ ខ្ញុំមិននៅមុខក្រាស់នាំអោយខ្មាសបងប្អូនទេ! ខ្ញុំនឹងលាឈប់ពីវិស័យនេះភ្លាម!"៕