ក្រោយលេចធ្លាយរូបថតរត់តាក់ស៊ី ពេលយប់ពីបីសន្លឹកក្នុងបណ្ដាញសង្គម កីឡាករប្រដាល់កម្ពុជា និងជាជើងឯកខ្សែក្រវាត់ពិភពលោក ISKA វ៉ន វីវ៉ាបានប្រាប់ផ្ដល់បទសម្ភាសន៍ តាមទូរស័ព្ទមកខេឃ្យូបនៅមុននេះបន្តិច។
កីឡាករប្រដាល់កម្ពុជា ធ្លាប់មានឈ្មោះបោះសម្លេងខ្លាំងបំផុតកាលពីប៉ុន្មានឆ្នាំមុន បាននិយាយថា ដើម្បីជីវភាពក្រុមគ្រួសារ លោកត្រូវរត់តាក់ស៊ីបន្ថែមទៀតពីព្រោះតែលោកមិនទាន់អាចប្រឡូកលើសៃវៀនប្រដាល់បានដូចពេលមុន។ កីឡាករប្រដាល់កម្ពស់ខ្ពស់រូបនេះបានបន្តថា លោកបានរត់តាក់ស៊ីនេះចំនួន៥ទៅ៦ថ្ងៃហើយៗលោកក៏មិនបោះបង់អាជីពប្រដាល់ដែលធ្លាប់តែជួយជ្រោមជ្រែងកេរ្តិ៍ឈ្មោះឲ្យល្បីនាពេលកន្លងមកនោះទេ ។
តែយ៉ាងណាក្ដី ក្នុងពេលនេះលោកមិនអាចឡើងវ៉ៃបានដោយសាររបួសដៃមិនជាស្រួលបួលដូចដើមនៅឡើយ។នៅពេលនេះអាជីពថ្មីរបស់លោកមិនទាន់អាចនិយាយបានថា ទទួលបានចំណូលគ្រាប់គ្រាន់នៅឡើយទេ ពីព្រោះតែលោកទើបនឹងរត់ហើយមិនទាន់មានម៉ូយច្រើនដឹងនៅឡើយ។
សូមបញ្ជាក់ថា កីឡាករមានប្រភពមកពីខេត្តកំពង់ចាមរូបនេះ បានរងរបួសបាក់ដៃ ពេលប្រកួតជាមួយកីឡាករបរទេសកាលពីឆ្នាំ២០១៥ ហើយរបួសនេះ ធ្វើឲ្យលោកត្រូវទៅព្យាបាលដល់ប្រទេសវៀតណាម។
ផ្ដល់សិទ្ធិដោយ៖KQUBE
