ខេត្តកោះកុង៖ នៅរសៀលថ្ងៃទី១២ធ្នូ ២០១៦នេះ មានបុរសម្នាក់ដែលត្រូវធ្យូងបាក់សង្កត់ ក្នុងពេលចូលទៅកាយធ្យូងក្នុងឡ។ហេតុការណ៍ដ៏គួរឲ្យរន្ធត់នេះ បានកើតឡើងលើទឹកដីភូមិថ្មីចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
ប្រភពពីសមត្ថកិច្ចទៅដល់កន្លែងកើតហេតុឲ្យដឹងថា បុរសរងគ្រោះខាងលើមានឈ្មោះ លី សាវឿន អាយុ៥៦ឆ្នាំ មានមុខរបរធ្វើចម្ការ មានរស់នៅកន្លែងកើតហេតុ។ ប្រភពបន្តថា បុរសអ្នកចម្ការដែលត្រូវបានឆេះភ្លើងក្នុងឡធ្យូងស្លាប់ចោលប្រពន្ធយ៉ាងអាណោចអាធ័មនោះ ខណ:ពេលដែលជនរងគ្រោះ ចូលទៅកាយធ្យូង ដែលកំពុងឆេះយ៉ាងសន្ធោសន្ធៅ ហើយដោយសង្ស័យថា ត្រូវធ្យូងជនរងគ្រោះចូលទៅកាយបាក់សង្កត់ ក៏ឆេះស្លាប់ក្នុងឡនោះតែម្ដងទៅ។
សមត្ថកិច្ចបានបន្តថា នៅមុនពេលកើតហេតុ បុរសជាប្ដីបានប្រាប់ប្រពន្ធថា គាត់ទៅកាយធ្យូងនៅចម្ការតាំងពីព្រឹក រហូតដល់ម៉ោង១២ថ្ងៃត្រង់ ប្រពន្ធគាត់ក៏ទូរស័ព្ទទៅដើម្បីហៅឲ្យមកហូបបាយ តែទូរស័ព្ទអត់មានអ្នកទទួលសោះ ប្រពន្ធគាត់ក៏ទៅដើរទៅតាម ក៏ស្រាប់តែមើលក្នុងឡធ្យូងទៅឃើញសល់តែឆ្អឹង។
ក្រោយដឹងហេតុការណ៍នេះហើយ កម្លាំងសមត្ថកិច្ចជំនាញ បានចុះពិនិត្យដល់កន្លែងកើតហេតុភ្លាម និងបានសន្និដ្ឋានថា គាត់ស្លាប់ដោយសារ ឆេះភ្លើងក្នុងឡធ្យូងពិតមែន ហើយក្រុមគ្រួសារបានរើសឆ្អឹងយកទៅធ្វើបុណ្យ ទៅតាមប្រពៃណី៕
ផ្ដល់សិទ្ធិដោយ៖VD7News.com