សិល្បៈ ៖ ពិតទេថា! គ្រូបង្រៀនមុខមិនស្អាតធ្វើឲ្យសិស្សស្រីៗមិនចាប់អារម្មណ៍ ថែមទាំងនាំគ្នាដេក និងប្រលែងគ្នាពេញថ្នាក់រៀន ប៉ុន្តែពេលគ្រូកំលោះរូបសង្ហាបង្ហាញវត្តមានភ្លាមមានសិស្សស្រីៗប្រជែងគ្នាសុំលេខទូរស័ព្ទ ហ្វេសប៊ុក ...? ចម្ងល់មួយនេះនឹងបានបកស្រាយយ៉ាងច្បាស់នៅក្នុងខ្សែភាពយន្តរឿង "សួស្ដីលោកគ្រូកំលោះ" របស់ផលិតកម្ម មហាហង្ស ដែលជាវណ្ណកម្មបែបកំប្លែងថ្មី មួយ ហើយជាចំណងដៃចុងឆ្នាំ២០១៦ សម្រាប់ទស្សនិកជនដែលនិយមគាំទ្រខ្សែភាពយន្តខ្មែរផងដែរ។
លោក អ៊ិន សុភិន ចាងហ្វាងផលិតកម្ម មហាហង្ស បានប្រាប់ថា ខ្សែភាពយន្តរឿង "សួស្ដីលោកគ្រូកំលោះ" គឺជាកុនខ្នាតធំលើកទី១២របស់ផលិតកម្មលោក ដែលបានថតអស់រយៈពេលជាងបីខែ និងចំណាយថវិកាផលិតជាងបួនដុល្លារ ។ ផលិតករកំពុងមានស្នាដៃលើវិថីសិល្បៈរូបនេះបន្តថាខ្សែភាពយន្តខាងលើនេះ គឺជាចំណងដៃថ្មី ហើយក៏ជាចំណីចក្ខុប្លែកអារម្មណ៍សម្រាប់អ្នកនិយមទស្សនាភាពយន្តខ្មែរនៅចុងឆ្នាំ២០១៦ផងដែរ ព្រោះខ្សែភាពយន្តមួយនេះ មានការចូលរួមសម្ដែងដោយកំពូលតារាល្បីៗកំពុងពេញនិយមពីសំណាក់ទស្សនិកជន។
លោក អ៊ិន សុភិន បន្តថា វណ្ណកម្មថ្មីរឿង "សួស្ដីលោកគ្រូកំលោះ" ផលិតកម្មលោកគ្រោងចាក់បញ្ចាំងគ្រប់រោងកុននៅថ្ងៃទី២២ខែ ធ្នូ ចុងឆ្នាំ២០១៦ ខាងមុខនេះ ហើយពេលខ្សែភាពយន្តនេះចេញបញ្ចាំងលោកសង្ឃឹមថា នឹងទទួលបានជោគជ័យខ្លាំង ព្រោះពេលTrailer ភ្លាមរឿងថ្មីនេះទទួលបានការចាប់អារម្មណ៍ខ្លាំងជាងរឿង "ព្រះនាងម្ចាស់ឡឺកឺ" ទៅទៀត។
គួរបញ្ជាក់ដែរថា ខ្សែភាពយន្តរឿង "សួស្ដីលោកគ្រូកំលោះ" គឺជាខ្សែភាពយន្តដុំទី១២ របស់ផលិតកម្ម មហាហង្ស ដែលមានការចូលរួមសម្ដែងដោយ អ្នកនាង សុខ សោម៉ាវត្តី អ្នកនាង ខ្ញុង នាយ ពែកមី នាយ គ្រឿន លោក ជា សុវណ្ណរា លោក អូន ឧស្សាហ៍ កញ្ញា វ៉ាន់ លីឡា ...រួមជាមួយតារាល្បីៗជាច្រើនរូបទៀត៕
ទស្សនាវីដេអូ
ផ្ដល់សិទ្ធិដោយ៖KQUBE
