ខេត្តប៉ៃលិន៖ ផ្ទុះប្រតិកម្មចេញហើយពី អនុប្រធានពន្ធនាគារខេត្តប៉ៃលិនម្នាក់ ដែលថាបានប្រព្រឹត្តិរឿងមិនត្រឹមត្រូវ ដោយហៅអ្នកទោសស្រី ជាអតីតតារាចម្រៀងម្នាក់ទៅអង្គុយផឹកស៊ីជាមួយគ្នា ហើយឱបថើបនៅមុខអ្នកទោស និងមន្ត្រីពន្ធនាគារមួយចំនួន នៅមុខពន្ធនាគារខេត្តស្ថិតក្នុងភូមិទឹកចេញ ឃុំស្ទឹងកាច់ ស្រុកសាលាក្រៅ ត្រូវខាងសាម៉ីខ្លួនបានអះអាងថា គឺមានគេមួលបង្កាច់រូបលោក ដោយខ្លួនមិនបានប្រព្រឹត្ត ដូចការចោទប្រកាន់អ្វីនោះទេ។ បន្ទាប់ពីមានព័ត៌មានលេចឮថា លោកអ៊ុយ វិចិត្រ អនុប្រធានពន្ធនាគារខេត្តប៉ៃលិន បានហៅទណ្ឌិតស្រីម្នាក់ ឈ្មោះអូ រស្មី ជាអតីតតារាចម្រៀង ទៅអង្គុយផឹកស៊ីជាមួយនៅអគារខាងលើ ហើយបានប្រព្រឹត្តិអំពើមិនគួរគប្បីជាមួយនឹងនាង ។
តាមប្រភពពីលោកអ៊ុយ វិចិត្រ លោកបានបដិសេធទាំងស្រុងនឹងព័ត៌មានចចាមអារ៉ាមខាងលើនេះ ដោយលោកទទួលស្គាល់ថា ពេលនោះ មានការផឹកស៊ីជាមួយនឹងអ្នកទោស ដោយមានមន្ត្រីអនុរក្សពន្ធនាគារចូលរួមជាច្រើននាក់មែន ហើយលោកអត់បានធ្វើដូច្នោះទេគ្រាន់តែប៉ះបន្តិចបន្ទួចតែប៉ុណ្ណោះ។
លោកបន្តទៀតថា ក្នុងកម្មវិធីនោះ គេបានចាប់ផ្តើមនៅវេលាម៉ោង១២ថ្ងៃត្រង់កាលពីថ្ងៃទី១៨ វិច្ឆិកា២០១៦ រហូតដល់ម៉ោង៤និង៣០នាទីរសៀលថ្ងៃដដែលទើបចប់ តែរូបលោកបានទៅចូលរួមក្រោយគេ ហើយមានការប៉ះពាល់បន្តិចបន្តួចដែរ ជាមួយនឹងនាងអូ រស្មី ដោយសារពេលនោះ លោកផឹកស៊ីទៅស្រវឹង ហើយក៏មានការប៉ះពាល់បន្តិចបន្តួចទៅ មិនធ្ងន់ធ្ងរដូចគេអះអាងនោះទេ ពីព្រោះរូបលោកចូលចិត្តការច្រៀងសប្បាយ ។
គួររំលឹកថា មូលហេតុដែលនាងសុំប្តូរចេញពីពន្ធនាគារព្រៃ.សមក រស់នៅក្នុងពន្ធនាគារខេត្តប៉ៃលិន ដោយសារនាងមានទំនាក់ទំនងស្នេហាជាមួយអ្នកទោសម្នាក់ទៀត ឈ្មោះយ៉េន ការ៉ាត់ ដែលជាអាណិកជន រស់នៅប្រទេសអូស្ត្រាលី ជាប់ទោសពាក់ព័ន្ធនឹងគ្រឿងញៀន បន្ទាប់ពីស្រឡាញ់គ្នារួច ទើបសុំប្តូរមកប៉ៃលិននេះតែម្តង ។
ចំណែកលោកនៅ ធឿង ប្រធានពន្ធនាគារខេត្តប៉ៃលិនបានឱ្យដឹងថា នៅក្នុងពន្ធនាគារខេត្តប៉ៃលិន អត់មានរឿងឱបថើបគ្នាបែបនេះទេ ហើយនេះជារឿងបំផ្លើសប៉ុណ្ណោះ៕
ផ្ដល់សិទ្ធិដោយ៖VD7News.com
