#ស្បែកគង់Challenge មានប្រភពចេញពី គ្រូធ្មប់ម្នាក់ (សុំមិនបញ្ចេញឈ្មោះ) ដែលតែងតែផុសអួតក្អេងក្អាង ធ្វើខ្លួនដូចជាអ្នកខ្លាំងពូកែមួយរូប ហើយពូកែជេរគេឈ្ងុយដូចដូងដុត។ ដើម្បីបកអាក្រាតមុខមាត់ពិត របស់លោកគ្រូនោះ បងប្អូនខ្មែរជាច្រើន ក៏បានបង្ហោះវីដេអូតៗគ្នា ទាក់ទងពីការកាប់សាច់ខ្លួនឯងមិនមុត រហូតក៏ក្លាយជាល្បែង "ស្បែកគង់Challenge" ដ៏ពេញនិយម មកទល់សព្វថ្ងៃនេះទៅ។
គួររំលឹកផងដែរថា ទោះជាមានការបកអាក្រាតយ៉ាងណា ក៏លោកគ្រូធ្មប់នោះ នៅតែធ្វើជាមិនដឹងរឿង ហើយព្យាយាមបំភ្លេចចោល ការបោកប្រាស់របស់ខ្លួន ចាត់ទុកបងប្អូនខ្មែរ ដូចកង្កែប ចង់បោកក៏បោក ចង់ញាត់ក៏ញាត់ ពិតជាគ្មានភាពខ្មាសអៀន សមជាគ្រូស្បែកមុខគង់(មុខក្រាស់) ពិតប្រាកដមែន។ យ៉ាងណាក៏ដោយ បងប្អូនខ្មែរមួយចំនួនតូច នៅតែជឿជាក់លើលោកគ្រូនោះ ហើយសុំអំពាវនាវ ឲ្យលោកគ្រូប្រើដាវសាម៉ូរៃ ដើម្បីកាប់ខ្លួនឯងឲ្យខ្លាំងៗ រួចថតបង្ហោះសារជាថ្មី ព្រោះពួកគេមិនអាចទ្រាំមើល លោកគ្រូសំណព្វរបស់ខ្លួន ត្រូវគេចោទប្រកាន់យ៉ាងអយុត្តិធម៌ បែបនេះទេ។
យុវជនឈាមរាវម្នាក់ ឈ្មោះ អ.ស.ប រស់នៅម្តុំអង់តែនទួលគោក បានស្រែកគំហក ទាំងមិនអស់ចិត្តថា៖ "មិនសមណា បងប្អូនខ្មែរចេះតែ តែស្ករ តែស្ករ តាមគ្នាចឹងទេ ! ខ្ញុំអាណិតលោកគ្រូណាស់ ដែលត្រូវគេចោទប្រកាន់ យ៉ាងអយុត្តិធម៌បែបនេះ។ ខ្ញុំចង់ឲ្យលោកគ្រូថត កាប់ខ្លួនឯងម្តងទៀត ហើយបើថាមិនយល់ទាស់ទេ ខ្ញុំអាចទៅជួយកាប់លោកគ្រូក៏បានដែរ"។
ប៉ុន្តែរហូតមកទល់នឹងពេលនេះ គេនៅតែមិនទាន់ឃើញ ការឆ្លើយតបណាពីលោកគ្រូ ទាក់ទងនឹងសំណើររបស់អ្នកគាំទ្រនោះទេ។ យ៉ាងណាក្តី អង្គភាពសារព័ត៌មាន របស់យើងខ្ញុំ សូមចាត់ទុក ការបង្ហាញវិជ្ជាស្បែកគង់ ការបង្ហាញយ័នអត់លិឍ និងពាក្យសម្តីជេប្រមាថគេតាមLive របស់លោកគ្រូធ្មប់ ជាការជះឥទ្ធពលអវិជ្ជមាន ដល់សង្គមខ្មែរសព្វថ្ងៃនេះ ព្រោះវាអាចបង្ហាញក្មេងៗ ពីរូបភាពមិនសមរម្យជាច្រើន។ ដូច្នេះ យើងខ្ញុំសូមអំពាវនាវ ឲ្យលោកគ្រូធ្មប់នោះ បន្តការបោកប្រាស់ ដោយភាពថ្លៃថ្នូរផងចុះ ដើម្បីកុំឲ្យមន្តអាគមរបស់ខ្មែរ ត្រូវសាបសូន្យ ព្រោះមនុស្សមុខគង់(មុខក្រាស់) ដូចលោកគ្រូ។
#រាយការណ៍ដោយ៖ លោកយាយចង្រ្កានហ្គាសនេត្រ រក្សាសិទ្ធិដោយ សារព័ត៌មានត្រាវដុត
ប្រភព Sandra Romdul
