សិល្បៈ ៖ តារាសម្ដែង និងពិធីការិនីអ្នកនាង ដួង ម៉ាណា ទើបតែរៀបការ និងទើបវិលត្រឡប់មកពីធ្វើដំណើរកម្សាន្តក្រេបទឹកឃ្មុំនៅក្រៅប្រទេសថ្មីៗនេះទេ ប៉ុន្តែទោះជានាងដើរកម្សាន្តបង្កើតអនុស្សាវរីយក្ដី តែនាងមិនភ្លេចការងារជួយសង្គមទេ។ ជាក់ស្ដែង ក្រោមត្រឡប់មកវិញតារារូបនេះបានដឹកដៃប្ដីចុះបង្រៀនក្មេងក្រីក្រតាមភូមិដែលជាការងារចាស់ខ្លួនស្រឡាញ់។
សកម្មភាពបង្ហាញពីចិត្តសប្បុរសនេះ ដួង ម៉ាណា បានប្រាប់ Kqube.net ថា នេះជាលើកទីមួយហើយដែលនាងបានដឹកដៃប្ដីចុះទៅបង្រៀនភាសាអង់គ្លេសដល់ក្មេងៗបន្ទាប់ពីរៀបការរួចមក ។ ដួង ម៉ាណា បន្តថា មូលហេតុដែលនាងដឹកដៃប្ដីចុះធ្វើសកម្មភាពមនុស្សធម៌នេះគឺមកពីប្ដីនាងក៏ជាមនុស្សស្រឡាញ់ការងារជួយសង្គមជាពិសេសគឺពាក់ព័ន្ធជាមួយក្មេងៗ តែម្ដង។
តារាទើបរៀបការថ្មីថ្មោងរូបនេះបញ្ជាក់ប្រាប់ថា សកម្មភាពដែលនាងទើបចុះបង្រៀនក្មេងៗនេះ គឺនៅក្នុងភូមិ បារុង ឃុំវិហារសួរ ស្រុកមុខកំពូល ខេត្តកណ្ដាល ហើយសកម្មភាពនេះក្រៅពីបង្រៀនភាសាអង់គ្លេស នាង និងប្ដីក៏បានបង្រៀនឲ្យពួកគេចេះធ្វើអនាម័យខ្លួនប្រាណ និងចែកជូនថ្នាំដុសធ្មេញ រួមជាមួយសាប៊ូសម្អាតខ្លួនខ្លះផងដែរ។
ដួង ម៉ាណា បញ្ជាក់ពីគោលបំណងថា ការដែលនាងលះបង់ពេលវេលា និងប្រាក់ផ្ទាល់ខ្លួនធ្វើសកម្មភាពនេះគឺចង់បណ្ដុះអារម្មណ៍ឲ្យក្មេងៗស្រឡាញ់ការសិក្សា ព្រោះនៅតាមខេត្តក្នុងតំបន់ដាច់ស្រយាលមួយចំនួនឪពុកម្ដាយពួកគេមានការងារស្រែចម្ការច្រើនមិនសូវបានជួយជំរុញទឹកចិត្តឲ្យកូនៗស្រឡាញ់ការរៀនសូត្រទេ៕
ផ្តល់សិទ្ធិដោយ៖KQUBE
