បុណ្យចូលឆ្នាំប្រពៃណីចិន ដែលត្រូវបានមើលឃើញថា ហាក់ត្រូវបានអនុវត្តន៍ ឬ ប្រតិបត្តិដោយកូនខ្មែរ សែស្រឡាយចិន យ៉ាងគគ្រឹកគគ្រេងនៅកម្ពុជា ប៉ុន្តែយ៉ាងណាក៏ដោយ ក៏ពិធីបុណ្យមិនត្រូវបានប្រតិបត្តិទាំងស្រុងនោះដែរ ព្រោះនៅមានគ្រួសារខ្លះ ដែលមិនជាប់សែស្រឡាយមិនបានរៀបចំសែនឡើយ ប៉ុន្តែពួកគេក៏ចូលរួមសប្បាយរីករាយជាមួយគ្នាផងដែរ។
ជាក់ស្ដែង លោក សុខា ជាបុគ្គលិកក្រុមហ៊ុនថេកណឡូជីមួយនៅទីក្រុងភ្នំពេញបានឲ្យដឹងថា តាំងពី ដើមរៀងគ្រួសាររបស់លោកក៏មិនដែលរៀបចំសែននៅថ្ងៃចូលឆ្នាំចិនឡើយ ដូនតារបស់លោកជាខ្មែរ មិនជាប់សែស្រឡាយឡើយ។
ស្រដៀងគ្នានេះដែរ លោក ចាន់ថា មានស្រុកកំណើតនៅខេត្តព្រៃវែង បានសម្ដែងក្ដីរីករាយ ចំពោះពិធីបុណ្យបរទេសមួយនេះ ប៉ុន្តែលោកអះអាងថា សម្រាប់លោកផ្ទាល់ទោះបីជា មានគ្រួសារជាអ្នកភ្នំពេញក្ដី ប៉ុន្តែលោកមិនបានរៀបចំសែនព្រេនអីនឹងគេនោះទេ។ ព្រោះទម្លាប់គ្រួសារលោក មិនមានរៀបចំ ហើយបើរៀបចំដោយខ្លួនឯងខ្លាចមិនទំនង។
ងាកមកអ្នកមីងសោភា ជាបុគ្គលិក ផ្នែកអនាម័យនៃក្រុមហ៊ុនមួយនៅម្ដុំទំនប់ទួលគោក បានប្រាប់ថា ចូលរួមសប្បាយជាមួយគេឯងដែរ តែមិនរៀបចំសែនព្រេនអ្វីនៅផ្ទះនោះទេ ព្រោះការសែននេះត្រូវចំណាយខ្ពស់ ម្យ៉ាងទៀតមិនមានជាប់សែស្រឡាយអ្វីនឹងគេទេ។
យ៉ាងណាក៏ដោយអ្នកទាំង៣ខាងលើនេះ បានប្រាប់ដូចៗគ្នាថា បើក្រុមហ៊ុនអនុញ្ញាតឲ្យឈប់សម្រាកក៏ជាការល្អដែរ ព្រោះបានជួបជុំគ្រួសារ ឬ រៀបចំ ដំណើរកម្សាន្ត បានសម្រាកលំហែកាយ។
គួរបញ្ជាក់ផងដែរថា ពិធីបុណ្យចូលឆ្នាំប្រពៃណីចិន-វៀតណាមនឹង ប្រារព្ធនៅថ្ងៃទី២៨ ខែមករា ឆ្នាំ២០១៧។
ផ្តល់សិទ្ធិដោយ៖KQUBE
