សិល្បៈ ៖ កាលពីថ្ងៃម្សិលមិញនេះតារាចម្រៀងលោក សាន ផានិត បានទៅសួរសុខទុក្ខអ្នកនិពន្ធបទចម្រៀង "ទឹកភ្នែកជនពាល" ដែលជាបទចម្រៀងដ៏ល្បីប្រចាំផលិតកម្ម រស្មីស្ទឹងសង្កែ ក្នុងឆ្នាំ២០០៤ ហើយលោកក៏មិនអាចទប់ទឹកភ្នែកបានឡើយ ខណៈដែលអ្នកនិពន្ធបទចម្រៀងជើងចាស់រូបនេះតែងប្រើពាក្យលាអ្នកទៅសួរសុខទុក្ខថា លាទៅមុន។
បទចម្រៀង "ទឹកភ្នែកជនពាល" ដែលជាការបកស្រាយដោយលោក ឈឿន ឧត្តម គឺជាស្នាដៃនិពន្ធរបស់អ្នកគ្រប់គ្រងកម្មវិធីប្រដាល់ដ៏ល្បីឈ្មោះទូរទស្សន៍ CTN លោក ម៉ា សេរី ហើយបទចម្រៀងមួយនេះបានដក់ជាប់ក្នុងបេះដូងប្រជាពលរដ្ឋខ្មែរទាំងក្នុង និងក្រៅស្រុកខ្លាំងជាងគេ ក្នុងចំណោមបទចម្រៀងដែលលោកបាននិពន្ធឡើងមានចំនួនប្រមាណជា៣០បទ។
លោក សាន ផានិត បានប្រាប់ Kqube.net នៅព្រឹកនេះថា កាលពីថ្ងៃម្សិលមិញនេះលោកបានទៅមើលថែអ្នកម្ដាយសម្រាកព្យាបាលនៅមន្ទីរពេទ្យ រុស្សី ជិតបន្ទប់លោក ម៉ា សេរី សម្រាកផងដែរ ពេលនោះលោកក៏បានចូលសួរសុខទុក្ខ និងបានសាកសួរគាត់ខ្លះពីអាការជំងឺ ដោយគាត់បាននិយាយតិចៗមកវិញថា លោកនៅស្គាល់ សាន ផានិត ។ ចំណែកបទចម្រៀងដែលគាត់និពន្ធមួយចំនួនឲ្យផលិតកម្ម រស្មីស្ទឹងសង្កែ គឺលោកចាំបានតែបទ "ទឹកភ្នែកជនពាល" មួយបទទេ ។
លោក សាន ផានិត បន្តថា ឃើញសភាពអតីតអ្នកនិពន្ធ និងអ្នកបញ្ចូលសំឡេងរបស់ស្ថានីយទូរទស្សន៍ប៉ុស្តិ៍លេខ៥លោក ម៉ា សេរី មានសភាពបែបនេះលោកពិតជាមិនអាចទប់ទឹកភ្នែកបានឡើយ ព្រោះគាត់តែងនិយាយលាអ្នកស្គាល់គ្នា អ្នកសិល្បៈ និងបងប្អូនខ្មែរថា លោកទៅមុនហើយ។
សាន ផានិត បន្តថា ពេលលោកថតរូបមកផុសក្នុងហ្វេសប៊ុក ពេលនេះក៏មានបងប្អូនសប្បុរសជនជួយតាមរយៈរូបលោកទៅលោក ម៉ាសេរី មានទឹកប្រាក់ចំនួន ៥០ម៉ឺនរៀល ហើយលុយនេះលោកក៏មានគម្រោងយកទៅប្រគល់ជូនគ្រួសារគាត់បើមិនថ្ងៃនេះ គឺថ្ងៃស្អែកតែម្ដង៕
ផ្តល់សិទ្ធិដោយ៖KQUBE
