រាជធានីភ្នំពេញ៖ ឯកឧត្ដម ខៀវ កាញ៉ារិទ្ធ រដ្ឋមន្ត្រីក្រសួងព័ត៌មានបានបញ្ជាក់ថា កំហុសរបស់ពិធីករពិធីការនីវិទ្យុABCលើកនេះ គឺក្រសួងមិនអនុញ្ញាតអោយឡើងនិយាយនៅលើកញ្ចក់ទូរទស្សន៍ទៀតឡើយ លើកលែងតែពួកគេខិតខំកែខ្លួនពីរបីឆ្នាំក្រោយទើបអាចឡើងនិយាយបានវិញ ព្រោះថាមិនអាចធ្វើខុសធ្ងន់ធ្ងរហើយ បែរជាត្រូវបញ្ចប់ដោយសារសុំទោសមួយម៉ាត់នោះទេ។
ឯកឧត្ដមរដ្ឋមន្ត្រីក្រសួងព័ត៌មានក៏បានពន្យល់ថា មូលហេតុដែលឈានទៅដល់ការបិទមិនឲ្យវិទ្យុABCកម្ពុជាសហការផ្សាយនៅលើកញ្ចក់ទូរទស្សន៍ប៉ុស្តិ៍៣កាលពីថ្ងៃទី២៤កន្លងមកនេះ ដោយតែពិធីករពិធីការនីវិទ្យុនេះ បានប្រើកាយវិការមិនសមរម្យ និងជេរប្រមាថមហាជនខុសវិជ្ជាជីវៈសារព័ត៌មានធ្ងន់ធ្ងរ។
ប្រាប់អ្នកសារព័ត៌មានបន្ទាប់ពីបញ្ចប់ពិធីជួបជុំជាមួយអ្នកនិវត្តន៍ជនក្រសួងព័ត៌មាន នាព្រឹកថ្ងៃទី២៥ មករានៅទីស្តីការក្រសួង ឯកឧត្តម ខៀវ កាញារិទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា ពិធីករពីធីការនីវិទ្យុABCបានប្រព្រឹត្តនូវអំពើពុំគួរគប្បី ដោយប្រើកាយវិការមិនសមរម្យ ការប្រើពាក្យសម្តីខ្វះសីលធម៌វិជ្ជាជីវៈ ជាអ្នកសារព័ត៌មាន និងបានប្រមាថមើលងាយអ្នកស្តាប់ ក៏ដូចជាទូរ ទស្សនិកជន ក្នុងពេលកំពុងបំពេញភារកិច្ចរបស់ខ្លួន ដែលធ្វើឲ្យប៉ះពាល់កិត្តិយស និងសេចក្តីថ្លៃថ្នូររបស់ពិធីករ ពិធីការនីផ្សេងទៀត។
ឯកឧត្ដមបញ្ជាក់ថា អ្នកណាក៏មានកំហុសខុសឆ្គងដែរ សម្រាប់វិជ្ជាជីវៈសារព័ត៌មាននេះ។ ប៉ុន្តែអ្វីដែលធ្វើឲ្យក្រសួងព័ត៌មានមិនអាចអនុគ្រោះបាននោះ ដោយសារតែវិទ្យុនេះបានប្រព្រឹត្តិនូវកំហុសពីរធំៗរួមមាន៖
ពិធីករពីធីការនីប្រើកាយវិការមិនសមរម្យ ធ្វើមានការរិះគន់ច្រើនពីមហាជន និងកំហុសធ្ងន់ធ្ងរមួយទៀតនោះគឺការមិនទទួលកំហុស ហើយបែរជាប្រើពាក្យសម្ដីឆ្លើយតបបែបអសីលធម៌ទៅវិញ។ប្រសាសន៍រដ្ឋមន្រ្តី ក្រសួងព័ត៌មាន “និយាយរួមវិទ្យុABCគាត់បានធ្វើការងារសង្គមច្រើនណាស់ ហើយក៏ជាវិទ្យុមួយដែលសកម្មក្នុងការផ្ដល់ប្រភពព័ត៌មាន និងមនុស្សធម៌។
ប៉ុន្តែថ្មីៗនេះ ពិតមែនតែគាត់ដំបូងមានការខុសឆ្គងខ្លះ តែកំហុសខុសឆ្គងនោះជាការធម្មតាទេ ចំពោះអ្នកដែលមិនធ្លាប់ធ្វើការងារហ្នឹង(ការងារព័ត៌មាន)។ ប៉ុន្តែកំហុសមួយដែលយើងមិនអាចអនុគ្រោះបាន គឺនៅពេលដែលមានការរិះគន់ហើយនោះ គាត់ត្រូវឆ្លើយបំភ្លឺ ត្រូវពន្យល់។ផ្ទុយទៅវិញគាត់យករបៀបបំភ្លឺរបស់គាត់ គឺការជេរបញ្ចោរទៅវិញ ដៀលគេទៅវិញ ដែលនេះ មិនមែនជាវិជ្ជាជីវៈរបស់ពិធីករពិធីការនីនោះទេ។
យើងត្រូវដាក់ខ្លួនការរិះគន់ណាអាចទទួលយកបានយើងទទួលយកទៅ អាណាមិនទទួលបានយើងពន្យល់ប្រាប់គេវិញតាមបែបវិជ្ជាជីវៈ។ មិនមែនយើងតាំងខ្លួនជាអ្នកល្បី ឬជាតួឯកនោះទេ”។
លិខិតផ្លូវការរបស់ឯកឧត្តម ខៀវ កាញ៉ារិទ្ធ រដ្ឋមន្ត្រីក្រសួងព័ត៌មាន ចេញផ្សាយនៅល្ងាចថ្ងៃទី២៤ ខែមករានេះ បានឲ្យលោក ខាំពូន កែវមុណី ដែលជាម្ចាស់ស្ថានីយវិទ្យុ-ទូរទស្សន៍ប៉ុស្តិ៍៣ រាជធានីភ្នំពេញ បញ្ចប់កិច្ចសហការផលិតកម្មវិធីជាមួយវិទ្យុABCកម្ពុជា។
ឯកឧត្ដមបានបញ្ជាក់លើលិខិតថា កន្លងមកក្រសួងព័ត៌មានបានឯកភាពអនុញ្ញាតឲ្យលោក ខាំពូន កែវមុណី ធ្វើកិច្ចសហការជាមួយស្ថានីយវិទ្យុABCកម្ពុជា FM107.50 MHz ក្នុងការផលិតកម្មវិធីចម្រុះ ដើម្បីធ្វើការផ្សាយផ្ទាល់តាមកញ្ចក់ស្ថានីយទូរទស្សន៍ប៉ុស្តិ៍៣ រាជធានីភ្នំពេញ រយៈពេល៣ម៉ោងក្នុង១ថ្ងៃ ចាប់ពីម៉ោង០៦ ដល់ម៉ោង៩ព្រឹក។
ប៉ុន្តែបន្ទាប់ពីស្ថានីយទូរទស្សន៍ប៉ុស្តិ៍៣ រាជធានីភ្នំពេញ បានដំណើរការផ្សាយកម្មវិធីនេះមួយរយៈពេលខ្លីកន្លងមក បានកើតមានប្រតិ កម្មពីសំណាក់មហាជនជាច្រើន ធ្វើការរិះគន់ទៅលើពិធីករ ពិធីការនី កម្មវិធីចម្រុះ ABC 3 Spring ដែលបានប្រព្រឹត្តនូវអំពើពុំគួរគប្បី ដោយសម្តែងកាយវិការមិនសមរម្យ ការប្រើពាក្យសម្តីខ្វះសីលធម៌ វិជ្ជាជីវៈ ជាអ្នកសារព័ត៌មាន និងបានប្រមាថមើលងាយអ្នកស្តាប់ ក៏ដូចជាទូរទស្សនិកជន ក្នុងពេលកំពុងបំពេញភារកិច្ចរបស់ខ្លួន ដែលធ្វើឲ្យប៉ះពាល់កិត្តិយស និងសេចក្ដីថ្លៃថ្នូររបស់ពិធីករ ពិធីការនីផ្សេងទៀត។
ឯកឧត្តម រដ្ឋមន្ត្រី បញ្ជាក់ថា ដើម្បីបញ្ឈប់នូវប្រតិកម្មពីសំណាក់មហាជន និងភាពអសកម្មទាំង ឡាយដែលកើតមានឡើងជាបន្តបន្ទាប់មកនេះ ក្រសួងព័ត៌មានតម្រូវឲ្យលោក ខាំពូន កែវមុណី បញ្ឈប់កិច្ចសហការផលិតកម្មវិធីរវាងស្ថានីយវិទ្យុ-ទូរទស្សន៍ប៉ុស្តិ៍៣ រាជធានីភ្នំពេញ ជាមួយស្ថានីយវិទ្យុABCកម្ពុជា FM107.50 MHz ជាបន្ទាន់ចាប់ពីថ្ងៃជូនដំណឹងនេះតទៅ៕ ដកស្រង់៖ វិទ្យុជាតិកម្ពុជា
