សិល្បៈ ៖ ថ្ងៃទី១៥ កុម្ភៈនេះមានតារាសិល្បៈជាច្រើនបានបង្ហាញបាច់ផ្កា ក៏ដូចជាកាដូផ្សេងនៅលើហ្វេសប៊ុក ។ យ៉ាងណាមិញតារាចម្រៀងកញ្ញា រតនៈ ពិសី ក៏ទទួលបានកាដូទឹកប្រាក់ចំនួន ១ ៥០០ ដុល្លារ ពីអតីតគូស្នេហ៍ចាស់ អាណិកជនខ្មែរបារាំង ដែលជាការលួងចិត្ត និងចង់ផ្សះផ្សាស្នេហាជាមួយនាងឡើងវិញ។
ផ្ដល់បទសម្ភាសន៍ជាមួយ Kqube.net កញ្ញា រតនៈ ពិសី បានប្រាប់ថា ទិវាក្ដីស្រឡាញ់ ១៤ កុម្ភៈ ម្សិលមិញនេះ នាងទទួលបានកាដូពិសេសពីបុរសអាណិកជនខ្មែរ បារាំង ដែលជាអតីតគូស្នេហ៍ចាស់របស់នាង ហើយកញ្ចប់កាដូជំនួសបាច់ផ្កានេះ គឺមានទឹកប្រាក់ចំនួន ១ ៥០០ ដុល្លារ តែនាងមិនបានថតផុសក្នុងហ្វេសប៊ុកដូចគេទេ។
រតនៈ ពិសី បន្តថា សម្រាប់ទំនាក់ទំនង រវាងរូបនាងជាមួយបុរសខាងលើ ដ្បិតតែធ្លាប់កើតមានរឿងប្រេះស្រាំ ដោយនាងមិនអាចទទួលយកគាត់បានក្ដី ប៉ុន្តែគាត់នៅតែព្យាយាមតាមលួងលោមនាង រហូតដល់ម្ដាយនាងថែមទៀត គឺគាត់ចង់រៀបការជាមួយនាងពិតប្រាកដ ប៉ុន្តែរហូតមកដល់ពេលនេះ នាងនៅតែមិនអាចទទួលយកស្នេហារបស់គាត់សារជាថ្មីបានទេ តែសម្រាប់កាដូគឺនាងទទួល ព្រោះនេះជាទឹកចិត្តរបស់គាត់។
តារាចម្រៀងស្រីរាងតូចច្រឡឹងរូបនេះបន្តទៀតថា សម្រាប់រឿងបែកបាក់ អតីតគូស្នេហ៍នាងគាត់ទទួលខុសគ្រប់បែបយ៉ាង ប៉ុន្តែគាត់មិនអាចបំភ្លេចនាងបាន ព្រោះគាត់ស្រឡាញ់នាងស្មោះ រហូតហ៊ានបញ្ជាក់ថា គាត់យល់ព្រមគ្រប់យ៉ាងឲ្យតែនាងចង់បានអ្វី មិនថា បង្កើតទំនួញ ពង្រីកហាង ឬទ្រព្យមានតម្លៃអ្វីទេ គឺគាត់អាចឲ្យបានទាំងអស់ តែសម្រាប់ចិត្តនាងគឺនៅតែមិនទោរទន់ទៅតាមការលួងលោមរបស់គាត់ទេ ព្រោះការបែកគ្នារវាងនាង និងបុរសម្នាក់នេះ គឺធ្លាប់មានរឿងធំ ព្រោះគាត់មានរឿងជាមួយសង្សារថ្មីគាត់ នឹងបានគំរាមដល់អាយុជីវិតរបស់នាងថែមទៀត៕
ផ្តល់សិទ្ធិដោយ៖KQUBE
