ខេត្តព្រះសីហនុ៖ ប្រភពជិតស្និទ្ធជាមួយជនបរទេសម្នាក់នេះ បានប្រាប់អ្នកសារព័ត៌មានរបស់ គេហទំព័រ ខេឃ្យូប ថាបុរសបរទេសម្នាក់នេះ ត្រូវប៉ូលិសចរាចរណ៍នៅខេត្ត ព្រះសីហនុ ប្រចាំការនៅក្នុងកំពង់សោម ត្រង់ចំណុចតោពីរ ចាប់គាត់ហើយផាកពិន័យរហូតដល់៥០០ដុល្លារអាមេរិក ហើយគំរាមថាបើមិនអោយនឹងចាប់ដាក់គុកទៀតផង។
លោក សុផល ជាបុគ្គលិកធ្វើការនៅផ្ទះសំណាក់មួយកន្លែង ហើយជាអ្នកស្គាល់គ្នាជាមួយជនបរទេសខាងលើបានប្រាប់ថា ការផាកពិន័យដោយមិនចេញវិក្កយបត្រអោយនេះ បន្ទាប់ពីភ្ញៀវរបស់គាត់បានជួលម៉ូតូពីផ្ទះសំណាក់ ហើយជិះទៅលេងនៅទីក្រុង ក៏ប៉ុន្តែគាត់អត់បានយកប័ណ្ណបើកបរទៅជាមួយ រូចប៉ូលិសក៏ចាប់ផាកគាត់តែម្ដង។
លោករៀបរាប់ប្រាប់ ខេឃ្យូប តាមបណ្ដាញសង្គមហ្វេសប៊ុកថា "មានភ្ញៀវម្នាក់ឈ្មោះ Philipp Ioannis បានជួលម៉ូតូម៉ាក ស្កូពី ពីផ្ទះសំណាក់របស់ខ្ញុំ ហើយគាត់មានគ្នា៥នាក់ បានជិះទៅដើរលេងនៅក្នុងទីក្រុងកំពង់សោម រួចប៉ូលិសក៏បានហៅសួរនាំគាត់ នឹងឆែកឆេរប័ណ្ណបើកបរ។
រួចនៅពេលដែលប៉ូលិសបានឆែកឃើញថាអត់មានប័ណ្ណបើកបរ ហើយពួកគេក៏បានទារពីភ្ញៀវ រួចភ្ញៀវក៏បានដកមួយរយដុល្លារ អោយទៅប៉ូលិស ក៏ប៉ុន្តែប៉ូលិសបាននិយាយថាអត់គ្រប់គ្រាន់ទេ បើអ្នកមិនអោយនឹងចាប់ដាក់គុក រួចបន្ទាប់មកទៀត ក៏បានអោយភ្ញៀវទុក លិខិតឆ្លងដែននៅកន្លែងប្រេសនីយ៍ រួចអោយភ្ញៀវទៅដកលុយនៅកន្លែងទូ ATM អោយបានគ្រប់ចំនួនប្រាំរយដុល្លារ បន្ទាប់មកភ្ញៀវគាត់បានយកលុយនោះអោយប៉ូលិសតែម្ដង"។
ទាក់ទងនិងបញ្ហានេះ លោកសុ ផល បានបញ្ជាក់ថា គឺលោកបានសាកសួរភ្ញៀវរបស់លោក បន្ទាប់ពីដំណើរកម្សាន្តថ្ងៃនេះ ទើបដឹងរឿងប៉ូលិស ផាកភ្ញៀវរបស់លោកអស់រហូតដល់៥០០ដុល្លារ។ ដូចនេះតើមន្ត្រីពាក់ព័ន្ធគួរចាត់វិធានការបែបណា ជាមួយប៉ូលិសចរាចរណ៍ដែលប្រចាំការនៅ ចំណុចតោពីរ ក្រុងកំពង់សោមនោះ។ ករណីនេះយើងនឹងទាក់ទងទៅភាគីពាក់ព័ន្ធ ដើម្បីបំភ្លឺ៕
ផ្តល់សិទ្ធិដោយ៖KQUBE
