
សិល្បៈ ៖ រយៈពេលពីរឆ្នាំចុងក្រោយនេះដ្បិតតែ សុខ សោម៉ាវត្តី បង្ហាញវត្តមានសម្ដែងខ្សែភាពយន្តភាគ និងដុំ បានច្រើនរឿង ប៉ុន្តែនាងមិនទាន់ជួបដៃគូជាក្មេងស្ទាវទេ។ ទើបតែពេលនេះអ្នកមេម៉ាយរូបស្រស់បានជួបប្រុសក្មេង Mr K ក្នុងរឿង "ក្រមុំចាស់ប៉ះក្មេងស្ទាវ" ដែលជាខ្សែភាពយន្តខ្នាតធំថ្មីរបស់ផលិតកម្ម មហាហង្ស ដោយតួឯកប្រុសវ័យក្មេងរូបនេះបានបោះពាក្យសម្ដីថា រូបគេពេញចិត្តអ្នកមេម៉ាយរូបស្រស់ច្រើនឆ្នាំមកហើយ។
បញ្ជាក់ប្រាប់ Kqube.net ក្នុងពិធីក្រុងពាលីរឿង "ក្រមុំចាស់ប៉ះក្មេងស្ទាវ" របស់ផលិតកម្ម មហាហង្ស នៅព្រឹកនេះ តួឯកប្រុស Mr Kបានប្រាប់ថា វត្តមានសម្ដែងខ្សែភាពយន្តខាងលើនេះ គឺជារឿងទីពីរសម្រាប់អាជីពសម្ដែងរបស់លោក បន្ទាប់ពីរឿង "កំណត់ហេតុនាងនាថ" ដែលលោកសម្ដែងជាតួរង និងកំពុងទទួលបានការចាប់អារម្មណ៍ខ្លាំង។ លោកបន្តថា សម្រាប់រឿងថ្មី"ក្រមុំចាស់ប៉ះក្មេងស្ទាវ" លោកទទួលបានតំណែងជាតួឯក ដែលត្រូវប៉ះជាមួយតារាសម្ដែងល្បីឈ្មោះអ្នកនាង សុខ សោម៉ាវត្តី ជាតួក្រមុំចាស់ ។
លោក K បន្តថា រវាងរូបលោក និងអ្នកនាង សុខ សោម៉ាវត្តី មិនដែលបានសម្ដែងរួមគ្នាទេ ហើយលោកក៏មានបំណងចង់ប៉ះជាមួយគាត់យូរឆ្នាំមកហើយ ប៉ុន្តែមិនដែលមានផលិតកម្មណាផ្គូផ្គង និងមានរឿងដែលត្រូវចាប់ដៃគ្នា ព្រោះលោក និងគាត់មានវ័យខុសគ្នា ។
ទើបតែពេលនេះផលិតកម្ម មហាហង្ស បានជ្រើសយកលោកឲ្យសម្ដែងជាតួឯករួមគ្នាជាមួយគាត់ក្នុងរឿង "ក្រមុំចាស់ប៉ះក្មេងស្ទាវ" ដូច្នេះហើយបំណងដែលលោកប៉ងជាច្រើនឆ្នាំសម្ដែងរួមគ្នា គឺបានសម្រេចហើយ។ តារាចម្រៀង និងសម្ដែងវ័យក្មេងរូបនេះបន្តថា លោកមានជំនឿចិត្តថា ពេលសម្ដែងរួមគ្នាជាមួយអ្នកនាង សុខ សោម៉ាវត្តី នឹងជួយលើកកេរ្តិ៍ឈ្មោះលោកកាន់តែល្បី ព្រោះគាត់មានទេពកោសល្យកំប្លុកកំប្លែងច្រើន ដោយឡែករូបលោកដ្បិតតែជាតារាថ្មី តែលោកក៏មិនភិតភ័យពេលជួបគាត់ឡើយ ពោលគឺលោកនឹងសម្ដែងឲ្យអស់ពីសមត្ថភាព ដើម្បីខ្សែភាពយន្តមួយនេះទទួលបានការគាំទ្រច្រើន ។
គួរបញ្ជាក់ដែរថា ខ្សែភាពយន្តរឿង "ក្រមុំចាស់ប៉ះក្មេងស្ទាវ" នឹងចេញថតនៅក្នុងខែកុម្ភៈនេះ ហើយរឿងនេះត្រៀមចំណាយទុន ជាងពីរម៉ឺនដុល្លារ និងគ្រោងចាក់បញ្ចាំងនៅមុនពេលចូលឆ្នាំខ្មែរ៕






ផ្តល់សិទ្ធិដោយ៖KQUBE