ខេត្តសៀមរាប៖ កាលពីពេលថ្មីៗនេះ ក្រុមស្រាវជ្រាវបុរាណវិទ្យា បានធ្វើកំណាយរកឃើញស្ថានីយ ស្លដែកបុរាណមួយកន្លែង ស្ថិតនៅភូមិសាលាក្រវ៉ាន់ ឃុំរំចេក ស្រុកបន្ទាយស្រី ស្ថិតក្នុងតំបន់ការពារទី២នៃរមណីយដ្ឋានអង្គរ។
នេះបើយោងតាមនាយកដ្ឋានផ្សព្វផ្សាយនៃអាជ្ញាធរជាតិអប្សរា។ បើយោងតាម AKP លទ្ធផលរកឃើញក្នុងការដ្ឋានកំណាយនេះ គឺជាភស្តុតាងដ៏សំខាន់សម្រាប់សិក្សាអំពីវិសាលភាព នៃទីតាំងផលិតលោហៈ ព្រមទាំងពិនិត្យមើលរចនាសម្ព័ន្ធនៃចង្ក្រានស្លដែក ក្នុងស្ថានីយលោហកម្មបុរាណ ដែលប្រទះឃើញមុនគេបង្អស់នៅក្នុងតំបន់អង្គរ និងជាអំណះអំណាងបន្ថែមសម្រាប់ ឱ្យកូនចៅជំនាន់ក្រោយ បានយល់ដឹងពីភាពអស្ចារ្យរបស់អាណាចក្រខ្មែរអង្គរ ដែលសាងសង់ប្រាសាទបានជាច្រើនដោយ ប្រើថ្មធំៗថា តើគាត់មានអ្វីកាត់ថ្ម គ្រឿងលើកដាក់ថ្ម ពិសេសគឺជំនាញ បច្ចេកទេសស្លដែក និងការផលិតសព្វាវុធការពារក្រុងអង្គរ។
ស្ថានីយស្លដែកបុរាណ មួយនេះត្រូវបានក្រុម ស្រាវជ្រាវអាជ្ញាធរជាតិអប្សរា បើកកំណាយស្រាវជ្រាវជាលើកទី២ រយៈពេល១០ថ្ងៃចាប់ពីថ្ងៃទី២៣ ខែមករា ឆ្នាំ២០១៧ ហើយចំពោះលទ្ធផលដែលបានរកឃើញ ពីការកំណាយនេះ នឹងត្រូវបានបង្ហាញជាសាធារណៈបន្ទាប់ពីបញ្ចប់ការកំណាយជាស្ថាពរ៕
ផ្តល់សិទ្ធិដោយ៖KQUBE
វីដេអូ
