សង្គ្រាមប្រឆាំងគ្រឿងញៀនបានផ្អាក ឈានចូលបេសកកម្មថ្មីប្រល័យលើអំពើពុករលួយវិញម្ដង ប៉ុន្តែមិនមែនមានន័យថាឈប់ធ្វើសកម្មភាពទាំងស្រុងលើការបង្ក្រាបជនល្មើសដែលពាក់ព័ន្ធនឹងថ្នាំញៀននោះទេ ដោយថ្មីៗនេះលោក Rodrigo Duterte ប្រធានាធិបតីអាណត្តិថ្មីរបស់ប្រទេសហ្វីលីពីន បានចេញបញ្ជាគំរាមយ៉ាងក្ដៅគគុកមួយថា ក្រុមឧក្រិដ្ឋកម្ម ជនជាតិកូរ៉េទាំងឡាយណាដែលជាប់ពាក់ព័ន្ធទៅនឹងករណីខុសច្បាប់ទាំងបួនចំណុចខាងក្រោម នឹងត្រូវបាញ់សម្លាប់ចោលភ្លាមៗ។
នេះបើយោងតាមប្រភព Korean Times បានឲ្យដឹងកាលពីល្ងាចថ្ងៃទី០៦ម្សិលមិញនេះ។ លោក Duterte បានគំរាមយ៉ាងចាស់ដៃទៅកាន់ ជនជាតិកូរ៉េទាំងឡាយ បូករួមទាំងជនជាតិចម្រុះផ្សេងៗទៀត ដោយបាញ់សម្លាប់ចោល ប្រសិនបើជនទាំងនោះ ជាប់ពាក់ព័ន្ធក្នុងករណីខុសច្បាប់មួយចំនួនដូចជា អ្នកដែលបើកផ្ទះបន ការចរាចរណ៍ និងប្រើប្រាស់ថ្នាំញៀន ការចាប់ជំរិត រួមទាំងមន្ត្រីធំៗណាមួយដែលហ៊ានប្រព្រឹត្តិអំពើពុករលួយទៀតផង។
គួរបញ្ជាក់ផងដែរថា យុទ្ធសាស្ត្រសម្លាប់០១ចំណេញ១០នេះ ទទួលបានការគាំទ្រយ៉ាងខ្លាំងពីសំណាក់ប្រជាជនពលរដ្ឋ និងប៉ូលិសជាដើម ដោយយល់ថានេះគឺជាវិធានការមួយបង្ក្រាបឧក្រិដ្ឋជន ដែលបង្កឲ្យប៉ះពាល់ដល់ការអភិវឌ្ឍន៍ប្រទេស ម្យ៉ាងទៀតការការគំរាមសម្លាប់ឧក្រិដ្ឋជនកូរ៉េទាំងនេះ ធ្វើឡើងបន្ទាប់ពីមេនគរបាលហ្វីលីពីនមួយរូបរាយការណ៍ថា ជនជាតិកូរ៉េមួយក្រុមសង្ស័យ ជាប់ពាក់ព័ន្ធជាមួយការស្លាប់របស់ លោក Jee Ick-joo អ្នកជំនួញមកពីប្រទេសកូរ៉េ៕
ផ្តល់សិទ្ធិដោយ៖KQUBE
