អប្បិយជំនឿ៖ ពិធីបុណ្យឆេងម៉េង ក៏ជាពិធីបុណ្យប្រពៃណីរបស់ជនជាតិចិនមួយបន្ថែមទៀតផងដែរបន្ទាប់ពីបុណ្យចូលឆ្នាំចិន ពិធីបុណ្យនេះ តែងប្រារព្ធឡើងជារៀងរាល់ឆ្នាំ នៃដើមខែមេសា វាកៀកទៅនឹងពិធីបុណ្យចូលឆ្នាំរបស់ខ្មែរដែរ ដោយឡែកសម្រាប់ពលរដ្ឋខ្មែរជាប់សែស្រឡាយចិនប្រារព្ធធ្វើពិធីបុណ្យនេះ គឺផ្ដោតទៅការសែនសង្កត់ផ្នូរដូនតាដែលបានស្លាប់នាពេលកន្លងមក។
យោងតាមលោកគ្រូចិនសែ ចាំង ហាំង ឡុង បានឲ្យដឹងថា ពិធីបុណ្យនេះ គឺធ្វើឡើងដើម្បីដល់គុណអ្នកស្លាប់ ដែលត្រូវជាសាច់ញាតិ ដូចជាមាតា បិតា ជីដូន ជីតា ឬបងប្អូន ដែលពួកគាត់ទទួលមរណភាពទៅហើយ មិនថាយូរឬឆាប់នោះទេ ដោយមានការសែនបាយសម្ល ត្រីសាច់ យ៉ាងតិចបំផុត ៨មុខ ដើម្បីឧទ្ទិសជូនដល់វិញ្ញាណខន្ធអ្នកទាំងនោះឲ្យមកទទួលនូវឥដ្ឋមនុញ្ញផលដែលបងប្អូនកូនចៅបានធ្វើជូន។
ប៉ុន្តែសម្រាប់ពិធីបុណ្យសែនឆេងម៉េងក្នុងឆ្នាំ២០១៧ ដែលនឹងប្រារព្ធធ្វើនៅដើមខែមេសាខាងមុខនេះ ចិនសែ ចាំង ហាំងឡុង បានឲ្យដឹងថា អ្នកកើតក្នុងឆ្នាំរកា និងឆ្នាំថោះ ឆុងឆ្នាំមិនសូវល្អទេ ដូច្នេះគួររើសថ្ងៃណាមួយ សម្រាប់សែន ព្រោះបុណ្យនេះគេអាចធ្វើមុន ឬក្រោយថ្ងៃកំណត់បាន។
លោកបន្តថាតាមជាក់ស្ដែងគេសែននៅថ្ងៃទី៤ ខែមេសា ប៉ុន្តែសម្រាប់អ្នកមានរាសីឆុង អាចធ្វើនៅមុនថ្ងៃនោះក៏បាន។ ជាងនេះទៅទៀតប្រភពដដែលក៏បានប្រាប់ថា អ្នកកើតក្នុងឆ្នាំ រកា និងថោះ នេះ គួរតមបីចំណុច គឺ
ទី១-កុំសង់ផ្ទះដោយផ្ទាល់ គឺអាចឲ្យឪពុកម្ដាយ ឬបងប្អូន ឬប្រពន្ធកូន អ្នកធ្វើជំនួសទៅ
ទី២-កុំទៅមើលសាកសពស្រស់ ដែលទើបស្លាប់ និងក្ដារមឈូសឲ្យសោះ
ទី៣-កុំដើរទៅទិសខាងកើតចំពេក រាល់ការចេញដំណើរ ដោយធ្វើដំណើរវាងហើយ ចាំទៅត្រង់វិញ។
ដើម្បីចង់ដឹងព័ត៌មានបន្ថែម សូមទស្សនាវីដេអូខាងក្រោមនេះ ដោយលោកគ្រូ បានបញ្ជាក់លម្អិតតែម្ដងអំពីបុណ្យឆេងម៉េង និងត្រណមផ្សេងៗក្នុងពិធីបុណ្យនេះ៖
ផ្ដល់សិទ្ធិដោយ៖KQUBE
