សារព័ត៌មាន (យុនហាប់) Yonhap របស់ប្រទេស កូរ៉េខាងត្បូង ចុះផ្សាយថា មេខ្លោងដឹកនាំការធ្វើឃាតលោក គីម ជុងណាម ក្នុងប្រទេស ម៉ាឡេស៊ី គឺជាកូនប្រុសអតីតបេសកជនជាន់ខ្ពស់ កូរ៉េខាងជើង ប្រចាំប្រទេស វៀតណាម ឈ្មោះ រី ជី យ៉ុង (Ri Ji Hyon) អាយុ ៣៣ ឆ្នាំ ។ យុនហាប់ បញ្ជាក់ថា លោក រី រស់នៅក្នុងប្រទេស វៀតណាម រយៈពេល ១០ ឆ្នាំ ចេះនិយាយភាសា វៀតណាម បានច្បាស់ និងបានបញ្ចុះបញ្ចូលស្ត្រីជនជាតិ វៀតណាម ឈ្មោះ ទួន ធីហុង (Doan Thi Huong) ដើម្បីឲ្យសហការជាមួយស្ត្រីជនជាតិ ឥណ្ឌូណេស៊ី ឈ្មោះ ស៊ីទី អាយ៉ាស់ (Siti Aisyah) ។
ឈ្មោះ រី ជី យ៉ុង មានតួនាទីជាមន្ត្រីការទូតស្ថិតក្រោមការហាត់រៀនក្នុងស្ថានទូត កូរ៉េខាងជើង ប្រចាំប្រទេស វៀតណាម ចាប់ពីឆ្នាំ ២០០៩ ។ ប៉ូលិស ម៉ាឡេស៊ី បានកំណត់អត្តសញ្ញាណជនជាតិ កូរ៉េខាងជើង ៨ នាក់ផ្សេងទៀត ជាជនសង្ស័យដែលអាជ្ញាធរត្រូវការសួរចម្លើយ ក្នុងនោះមួយចំនួនកំពុងលាក់ខ្លួនក្នុងស្ថានទូត កូរ៉េខាងជើង ប្រចាំទីក្រុង កូឡាឡាំពួរ ។ ប៉ូលិសអន្តរជាតិបានចេញសេចក្ដីជូនដំណឹងបន្ទាន់មួយ ដែលជាលិខិតមានយុត្តាធិការនាំទៅរកការចាប់ខ្លួនជនជាតិ កូរ៉េខាងជើង ៤ នាក់ ក្នុងប្រទេស ម៉ាឡេស៊ី ។
កាលពីសប្ដាហ៍មុនប៉ូលិសរបស់ប្រទេស ម៉ាឡេស៊ី បញ្ជាក់ថា នឹងមានការចាប់ខ្លួនមនុស្សច្រើនថែមទៀតក្នុងករណីឃាតកម្មលោក គីម ជុងណាម ។ ប៉ូលិស ម៉ាឡេស៊ី បានកំណត់អត្តសញ្ញាណជនជាតិ កូរ៉េខាងជើង 8 រូប ដែលត្រូវនាំខ្លួនទៅសាកសួរ ជាប់ពាក់ព័ន្ធនឹងករណីឃាតកម្មលោក គីម ជុងណាម ក្នុងនោះមួយចំនួនកំពុងលាក់ខ្លួនក្នុងស្ថានទូត កូរ៉េខាងជើង ប្រចាំទីក្រុង កូឡាឡាំពួរ ។
ប្រភពៈ thestar
ផ្ដល់សិទ្ធិដោយ៖KQUBE
