ការជួយសង្គ្រោះស្រ្តីក្រីក្រសម្រាលកូននៅតំបន់ដាច់ស្រយាលក្នុងខេត្តរតន:គីរី៖ នៅម៉ោងប្រមាណ៥ទៀបភ្លឺនៅថ្ងៃទី១៨ ខែមីនា ឆ្នាំ២០១៧ មានករណីស្ត្រីម្នាក់ឈឺពោះសំរាលកូននៅក្នុងចំការស្វាយចន្ទី ជាប្រជាពលរដ្ឋក្រីក្រដោយមកធ្វើដំណើរមករកមូលដ្ឋានសុខាភិបាលមិនទាន់ ក៏បានសំរាលកូននៅក្នុងចំការនោះ។
បន្ទាប់ពីបានទទួលពត៍មាននេះភ្លាម លោកប្រធានមន្ទីរពេទ្យបង្អែកបរកែវបានបញ្ជូនឆ្មបនិងរថយន្តទៅជួយធ្វេីអន្តរាគមន៍ដេីម្បីសង្រ្គោះនិងបញ្ជូនស្ត្រីនិងទារក ទៅថែទាំនៅក្នុងមន្ទីរពេទ្យបង្អែកបរកែវ។ ស្ថានភាពស្ត្រីនិងទារកមានសុខភាពល្អធម្មតា ហើយកំពុងស្ថិតនៅក្រោមការថែទាំដោយយកចិត្តទុកដាក់ពីមន្រ្តី សុខាភិបាល។
ស្រ្តីនេះរស់នៅភូមិលុងឃុង ឃុំលុងឃុង ស្រុកបរកែវ ខេត្តរតន:គីរីចំងាយពីចំការនោះមកមន្ទីរពេទ្យបង្អែក ប្រហែល៣៦គីឡូម៉ែត្រ ហើយអ្នកបេីករថយន្តទៅជួយសង្រ្គោះ គឺលោកប្រធានមន្ទីរពេទ្យបង្អែកផ្ទាល់តែម្តង។
ឯកឧត្តមរដ្ឋមន្ត្រីក្រសួងសុខាភិបាល ម៉ម ប៊ុនហេង សូមសំដែងនូវការកោតសរសេីរដល់ទង្វើជួយសង្រ្គោះបានទាន់ពេលវេលា ទឹកចិត្តមនុស្សធ៌មប្រកបដោយក្រមសីលធ៌មវិជ្ជាជីវ:ពិតប្រាកដរបស់មន្រ្តីសុខាភិបាលដែល បានបំពេញតួនាទីជាគ្រូពេទ្យល្អនេះ។
សូមជូនពរដល់ស្ត្រីនិងទារកដែលបានប្រសូត្រដោយសុវត្ថិភាពហើយនេះ មានសុខភាពល្អនិងជួបតែសំណាងល្អជានិច្ច។ សូមលើកទឹកចិត្តដល់មន្ត្រីសុខាភិបាលទាំងអស់បន្តនៅភារកិច្ចក្នុងការជួយសង្រ្គោះនេះនៅទូទាំងប្រទេស។ សូមកត់សម្គាល់ថា នេះមិនមែនជាលើកទី១ទេ ដែលមន្ត្រីសុខាភិបាលបានជួយដល់ស្ត្រីសម្រាលកូននៅតាមផ្លូវក្តីឫក្រោមដើមឈើក្តី ដែលបានអនុវត្តភារកិច្ចជួយសង្រ្គោះបែបនេះជូនដល់ស្ត្រីក្រីក្រទូទៅ ហើយនឹងបន្តការជួយនេះនៅគ្រប់ទីកន្លែង ប្រសិនបើមានព័ត៌មានទាន់ពេលមកមូលដ្ឋានសុខាភិបាលសាធារណ:។
ព័ត៌មានទទួលបានពីមន្ទីរសុខាភិបាលខេត្តរតន:គីរី។
ក្រសួងសុខាភិបាលនៃព្រះរាជាណាចក្រកម្ពុជា
