ខេត្តព្រះសីហនុ៖ លោកវរសេនីយ៍ត្រីភុល ភស្តា អធិការនគរបាលក្រុងព្រះសីហនុ បានអោយដឹងថា នៅយប់មិញនេះ វេលាម៉ោង២និង៣០នាទីរំលងអធ្រាត្រ ឈានចូលថ្ងៃទី១៩ ខែមិនា ឆ្នាំ២០១៧នេះ នៅចំណុចកន្ទុយនាគឆ្នេរម៉ូតែលសុខា មានអំពើហិង្សាមួយកើតឡើងដោយមាននារីទំនើងបានណាត់វ៉ៃគ្នានៅទីនោះ បណ្តាលឲ្យ នារីម្នាក់រងរបួសធ្ងន់រហូតដល់សន្លប់បញ្ជូនមកបន្ទីរពេទ្យ។
យោងតាមលោកភុល ភស្តាអធិការក្រុងបានបញ្ជាក់ថា៖ ក្រោយកើតហេតុ កម្លាំងអធិការដ្ឋាននគរបាលក្រុង បានធ្វើអន្តរាគមន៍ ចាប់ខ្លួនបានជនសង្ស័យ៣នាក់ ៖
ទី១-ឈ្មោះអ៊ំុ សុផានិត ភេទស្រី អាយុ១៨ឆ្នាំ មុខរបរបុគ្គលិកហាងបារាំង ស្នាក់នៅផ្ទះជួលក្រុមទី៤១ ភូមិ១ សង្កាត់លេខ៤ក្រុង-ខេត្តព្រះសីហនុ(ជាអ្នកដៃដល់)។
ទី២-ឈ្មោះធារ៉ា ចិន្តា ភេទស្រីអាយុ១៧ឆ្នាំ មុខរបរនៅផ្ទះ ស្នាក់នៅបន្ទប់ជួលជាមួយឈ្មោះ អ៊ំុ សុផានិត ជាសហចារីរួមជាមួយរួមដៃជនសង្ស័យ ។ ទី៣-ឈ្មោះ ឈុន ប្រុស ភេទប៉េដេ អាយុ18ឆ្នាំ មុខរបរលក់គ្រឿងអនុស្សាវរីយ៏តាមមាត់សមុទ្រ បច្ចុប្បន្នរស់នៅក្រុមទី២៦ ភូមិ៤សង្កាត់លេខ៤ក្រុង-ខេត្តព្រះសីហនុ ជាសហចារីបានចូលរួមធ្វើសកម្មភាព។ រីឯភាគីម្ខាងទៀតឈ្មោះ មីុ ស្រីនិច ភេទស្រី អាយុ១៥ឆ្នាំ មុខរបរបុគ្គលិកហាងបារាំង រស់នៅក្រុមទី៥ ភូមិ៤ សង្កាត់លេខ៤ ក្រុង-ខេត្តព្រះសីហនុ រងរបួសចំក្បាលពីក្រោយ ៣កន្លែងធ្ងន់ កំពុងសំរាកព្យាបាលនៅមន្ទីរពេទ្យបង្អែកខេត្ត ។
លោកអធិការបានបញ្ជាក់បន្ថែមថា ៖ គូជម្លោះនេះសុទ្ធតែជើងខ្លាំងរៀងៗខ្លួន ជាងពាក់កណ្តាលអធ្រាត្រ មិនចូលដេកពួន,ដោយផ្តើមចេញពីការនិយាយដើមនិយាយចុងគ្នា ឈ្មោះស្រីនិច និង គ្នីគ្នា បានទិញស្រាបៀរមកផឹកចាំមុន នៅសួនច្បារកន្ទុយនាគ ហើយទូរស័ព្ទហៅឈ្មោះ អ៊ំុ សុផានិត មកវ៉ៃគ្នានៅទីនោះ។
ពេលម្ខាងទៀតជិះម៉ូតូហួស ឈ្មោះស្រីនិចបានស្រែកហៅ ពេលចុះពីម៉ូតូស្ទុះ វ៉ៃគ្នាតែម្តង មួយទល់នឹងមួយ តែឈ្មោះអ៊ំុសុផានិត យកកូនសោរម៉ូតូធ្វើជាអាវុធចាក់ក្បាលស្រីនិច បណ្តាលឲ្យរបួសធ្ងន់រហូតដល់សន្លប់តែម្ដង៕ ដោយ៖ (អ៊ង នី)
ផ្ដល់សិទ្ធិដោយ៖VD7News
