បន្ទាប់ពីអាជ្ញាកណ្ដាលបានផ្លុំកញ្ចែបញ្ចប់ការប្រកួត ប្រធានបច្ចេកទេសក្លឹប Barcelona លោក Roberto Fernandez បានបង្ហាញក្ដីរីករាយ ដែលក្លឹបរបស់ខ្លួនទទួលជ័យជម្នះក្នុងកីឡដ្ឋាន Estadio Santiago Bernabeu និងក៏បាននិយាយជំរុញឲ្យគណៈកម្មការរៀបចំការប្រកួតបាល់ទាត់អេស្ប៉ាញ ពិនិត្យឡើងវិញនូវកាយវិការប្រតិកម្មរបស់ Sergio Ramos ពេលដែលទទួលកាត់ក្រហមដេញចេញពីការប្រកួត។
អតីតកីឡាករវ័យ៥៤ឆ្នាំបានសន្និដ្ឋានថា ប្រតិកម្មរបស់ប្រធានក្រុម Real Madrid ជាកំហុសប្រហាក់ប្រហែលទៅនឹងកំហុសរបស់ Neymar ត្រូវបានជាប់បម្រាម៣ប្រកួតកាលពីប៉ុន្មានសប្ដាហ៍មុន។
“ Ramos ទទួលបានកាតក្រហម ពិតជាសាកសម ហើយ Casemiro គួរតែទទួលកាតក្រហមដេញចេញកាលពីវគ្គទីមួយផងដែរ។ ខ្ញុំមិនដឹងថានរណាជាគោលដៅនៃប្រតិកម្មរបស់ Ramos នោះទេអ្នក(គណៈកម្មការរៀបចំការប្រកួតបាល់ទាត់អេស្ប៉ាញ) គួរតែទៅសួរគាត់។" ប្រធានបច្ចេកទេសបាល់ទាត់ខាងលើ និយាយទៅកាន់ប៉ុស្តិ៍ទូរទស្សន៍ Movistar Partidazo ។
“ គណៈកម្មការរៀបចំការប្រកួតបាល់ទាត់អេស្ប៉ាញគួរតែចាត់ចែងពិនិត្យ និងស៊ើបអង្កេតលើស្ថានភាពនេះ" Roberto Fernandez ។
Ramos បានឈូសជើង Messi ឲ្យដួលហើយអាជ្ញាកណ្ដាល សម្រេចពិន័យកាតក្រហមតែម្ដង។ ពេលដែលទទួលកាត់ក្រហមហើយ រូបគេបានដើរចេញជាមួយនឹងកាយវិការមួយចំនួន ទៅកីឡាករឬនរណាម្នាក់តែកាយវិការនេះត្រូវបានគេដឹងថាសំដៅទៅលើ Gerrard Pigue៕
