ប្រទេស ចិន បានបញ្ជាក់ប្រាប់រដ្ឋាភិបាល សហរដ្ឋអាមេរិក ថា ទីក្រុង ប៉េកាំង បានព្រមានដល់ប្រទេស កូរ៉េខាងជើង រួចហើយថា ប្រទេស ចិន នឹងដាក់ទណ្ឌកម្មឯកតោភាគីប្រឆាំងប្រទេស កូរ៉េខាងជើង ប្រសិនបើប្រទេសនេះ សាកល្បងគ្រាប់បែកនុយក្លេអ៊ែរម្ដងទៀត ។
នេះគឺជាការប្ដេជ្ញាដ៏កម្ររបស់ប្រទេស ចិន ដែលអះអាងថានឹងដាក់ទណ្ឌកម្មប្រឆាំងសម្ព័ន្ធមិត្តរបស់ខ្លួន ក្នុងពេលដែលភាពតានតឹងកើនឡើងខ្លាំងបំផុតមិនធ្លាប់មាននៅលើឧបទ្វីបកូរ៉េ រវាងទីក្រុង វ៉ាស៊ីនតោន និងទីក្រុង ព្យុងយ៉ាង ពាក់ព័ន្ធនឹងកម្មវិធីអាវុធនុយក្លេអ៊ែរ និងមីស៊ីល ។ រដ្ឋមន្ត្រីការបរទេស អាមេរិក លោក រ៉េក ថឺលីសឹន និយាយថា ប្រទេស ចិន បានជំរុញដល់ កូរ៉េខាងជើង កុំឲ្យសាកល្បងគ្រាប់បែកនុយក្លេអ៊ែរបន្ថែមទៀត ។
លោក ថឺលីសឹន មិនបានបញ្ជាក់ថា តើប្រទេសចិនបានព្រមានដល់ប្រទេស កូរ៉េខាងជើង នៅពេលណាឡើយ ប៉ុន្តែលោកនឹងធ្វើជាប្រធានក្នុងកិច្ចប្រជុំរដ្ឋមន្ត្រីការបរទេសនៃសមាជិកក្រុមប្រឹក្សាសន្តិសុខអង្គការសហប្រជាជាតិ ជាពេលដែលលោកនឹងសង្កត់ធ្ងន់ទៅលើភាពចាំបាច់ដែលត្រូវអនុវត្តទណ្ឌកម្មដែលបានដាក់ទៅលើប្រទេស កូរ៉េខាងជើង ។