សិល្បៈ ៖ កាលពីថ្ងៃទី១៨ មេសា នេះផលិតកម្ម ថោន បានចេញបទចម្រៀងថ្មី CD Vol 109 មានចំនួន១០បទ ដែលជាការបកស្រាយពីលោក ម៉ៅ ហាជី តែម្នាក់ឯង។ ជាពិសេសទៀតនោះបទចម្រៀងមួយវ៉ុលនេះ គឺជាស្នាដៃនិពន្ធពីអ្នកនិពន្ធល្បីឈ្មោះនៅ ថោន ដូចជាលោក យឹម តាស្រង់, លី វណ្ណារិន, ជួន សុជា, និងលោក សោម ដូរ៉េ ហើយក៏ជាការនិពន្ធបទភ្លេងពីលោក ដាភ្លេង ផងដែរ។
លោក អ៊ិន រិទ្ធីចិត្រ អ្នកគ្រប់គ្រងការផលិតនៅផលិតកម្ម ថោន បានប្រាប់ថា បទចម្រៀងទាំង១០បទរបស់លោក ម៉ៅ ហាជី គឺ ថោន បានរៀបចំធ្វើឡើយច្រើនខែមកហើយ បទទាំងនេះគឺជាទំនុកច្រៀង និងបទភ្លេងនិពន្ធថ្មីរបស់អ្នកនិពន្ធឆ្នើម៤រូប និងអ្នកភ្លេងដ៏ជំនាញម្នាក់ប្រចាំផលិតកម្ម ថោន ដោយពួកគាត់បានរួមគ្នានិពន្ធយ៉ាងសម្រិតសម្រាំង ដើម្បីឲ្យលោក ម៉ៅ ហាជី ច្រៀងតែម្នាក់ឯង ។
អ្នកគ្រប់គ្រងរូបនេះបន្តថា មូលហេតុដែល ថោន រៀបចំលោក ម៉ៅ ហាជី ច្រៀងមួយវ៉ុលម្នាក់ឯងដូច្នេះ គឺមកពីបានឃើញប្រជាប្រិយភាពលោកនៅតែទទួលបានការគាំទ្រខ្លាំងពីសំណាក់ទស្សនិកជន ។ ចំណុចនេះគួបផ្សំលោករាងស្ងប់ស្ងាត់មួយរយៈពេល ខណៈដែលមានបញ្ហាចាស់ៗមួយចំនួនផងនោះទេ ថោន ទម្លាក់បទឲ្យលោកមួយវ៉ុល ដើម្បីបង្កើនប្រជាប្រិយភាពរបស់លោកឡើងវិញ។
លោក អ៊ិន រិទ្ធីចិត្រ បន្តថា សម្រាប់ CD Vol 109 គឺ ថោន បានចេញលក់តាំងពីមុនចូលឆ្នាំមកម្ល៉េះ តែទើបចេញនៅលើ page Official Town Production កាលពីថ្ងៃទី១៨ទេ ហើយសម្រាប់ MV វ៉ុលពិសេសនេះក៏គ្រោងចេញនៅពេលឆាប់ៗនេះដែរ ព្រោះពេលនេះថតបានប្រមាណជា៤០ភាគរយហើយ៕
