សិល្បៈ ៖ កាលពីថ្ងៃទី២៥ មេសាឆ្នាំ២០១៧នេះ ក្រសួងវប្បធម៌បានសម្រេចបិទគ្រប់សកម្មភាពសិល្បៈតារាសម្ដែងកញ្ញា ដេនីក្វាន់ រហូតព្រមានដល់ផលិតកម្មក្នុងស្រុក បើនៅតែគឃ្លើនយកតារារូបនេះឲ្យសម្ដែងភាពយន្ត ឬការងារសិល្បៈផ្សេងៗនឹងត្រូវពិន័យបិទមិនឲ្យបញ្ចាំងឡើយ។ វិធានការនេះធ្វើឲ្យទស្សនិកជនជាច្រើនបានលើកជាសំណួរថា តើវាសនាភាពយន្តរឿង "ផ្ទះចិញ្ចឹមខ្មោច" ទៅជាយ៉ាងណា នៅពេលតួឯកស្រីទទួលការពិន័យ ខណៈដែលរឿងមួយនេះគ្រោងដាក់បញ្ចាំង ?
តារាសម្ដែងដ៏សិចស៊ីកញ្ញា ដេនីក្វាន់ ត្រូវក្រសួងវប្បធម៌បានចេញសេចក្ដីប្រកាសសម្រេចបិទសកម្មភាពសិល្បៈរយៈពេលមួយឆ្នាំចាប់ពីថ្ងៃទី២៥មេសាតទៅ។ ក្នុងនោះលិខិតខាងលើក៏បានបញ្ជាក់ថា សម្រាប់សកម្មភាពសិល្បៈដែលតារាស្រីរូបបង្ហាញមុនថ្ងៃប្រកាសគឺបានអនុញ្ញាតឲ្យចេញបញ្ចាំងធម្មតា ប៉ុន្តែសម្រាប់ការងារថ្មីក្រោយថ្ងៃទី២៥គឺមិនបានអនុញ្ញាតឡើយ។ ចំណុចនេះធ្វើឲ្យមានមតិជាច្រើនបានចោទសួរគ្នាថា នៅពេលភាពយន្តរឿង "ផ្ទះចិញ្ចឹមខ្មោច" សម្ពោធដាក់បញ្ចាំងនៅពេលខាងមុខ តើអាចមានវត្តមានតួឯកស្រី ដេនីក្វាន់ ចូលរួមដែរទេ ?
ជុំវិញការលើកឡើងនេះពេលលោក តាន់ ចន្ថា អ្នកផលិតព័ត៌មាន Kqube.net សួរបញ្ជាក់ពីលោក សែម វិសាល ចាងហ្វាងផលិតកម្ម Wonderfilm លោកបានប្រាប់ថា មកដល់ថ្ងៃនេះភាពយន្តរឿង "ផ្ទះចិញ្ចឹមខ្មោច" របស់លោកមិនទាន់សម្រេចដាក់បញ្ចាំងនៅថ្ងៃណាប្រាកដទេ ពោលគឺភាពយន្តមួយនេះនៅបន្តពិនិត្យពណ៌ និង Soud បន្ថែមទៀត។ ដោយឡែកសម្រាប់វត្តមាន ដេនីក្វាន់ អាចមានឱកាសបង្ហាញមុខក្នុងពិធីសម្ពោធ ឬអត់នោះលោកមិនទាន់ឆ្លើយចេញទេ ព្រោះរឿងនេះលោកនឹងត្រូវពិភាក្សាជាមួយក្រសួងបន្ថែមទៀត ដូច្នេះហើយលទ្ធផលយ៉ាងណានោះនៅមិនទាន់ដឹងទេ។
ខណៈដែលជោគវាសនាភាពយន្តរឿង "ផ្ទះចិញ្ចឹមខ្មោច" មិនទាន់អាចកំណត់បាន ព្រោះតួឯកស្រីកំពុងជួបព្យុះភ្លៀងនោះលោក សែម វិសាល ក៏បានអះអាងដែរថា សម្រាប់ការជោគជ័យ ឬមិនជោគជ័យរឿង "ផ្ទះចិញ្ចឹមខ្មោច" មិនមែនផ្ដោតទៅលើតែ ដេនីក្វាន់ ម្នាក់ទេ ទោះជានាងជាតួឯកក៏ដោយ គឺរឿងរបស់លោកមានចំណុចសំខាន់ៗជាច្រើនទៀតសម្រាប់ទាញយកការគាំទ្រ ៕
