សិល្បៈ ៖ បទចម្រៀងដំបូងរបស់លោក កែវ វាសនា នៅក្នុងផលិតកម្ម ថោន បទ "តើ...គេ" ដែលជាបទច្រៀងរួមគ្នាជាមួយលោក ខេម បានចេញ CD មានរយៈពេលជិតមួយឆ្នាំមកហើយ ពោលគឺបទនេះបានចេញតាំងពីលោក កែវ វាសនា បានចូលកុងត្រាភ្លាមៗ នៅ ថោន មកម្ល៉េះ។ បទល្បីដែលទទួលបានការគាំទ្រច្រើនមួយនេះ ថោន បានពន្យារពេលចេញ MV ជាច្រើនខែ ដែលធ្វើឲ្យទស្សនិកជនជាច្រើនរង់ចាំទស្សនា ។
ទើបតែយប់មិញនេះបទ "តើ...គេ" បានចេញ Trailer ហើយដែលមានទស្សនិកជនជាច្រើនបានគាំទ្រ និងសរសើរថា MV បទនេះឡូយកប់។ លោក អ៊ិន រិទ្ធីចិត្រ អ្នកគ្រប់គ្រងការផលិតនៅ ថោន បានប្រាប់លោក តាន់ ចន្ថា អ្នកផលិតព័ត៌មាន Kqube.net នៅមុននេះបន្តិចថា បទចម្រៀងមួយបទនេះលោក យឹម តាស្រង់ បាននិពន្ធឡើងដើម្បីស្វាគមន៍លោក កែវ វាសនា ចូល ថោន ដោយលោកបានបង្កើតសាច់រឿងតម្រូវឲ្យ កែវ វាសនា ច្រៀងរួមគ្នា ជាមួយ ខេម ដែលជាតារាចម្រៀងមានប្រជាប្រិយភាពដូចគ្នា។
អ្នកគ្រប់គ្រងរូបនេះបន្តថា បទចម្រៀងមួយនេះគឺគ្រោងចេញ VCD Vol 90 ដែលត្រូវចេញលក់នៅក្នុងសប្ដាហ៍ទីមួយ ឬសប្ដាហ៍ទីពីរក្នុងខែឧសភាខាងមុខនេះហើយ។ គួរបញ្ជាក់ដែរថា បទ "តើ...គេ” ដឹកនាំសម្ដែងដោយលោក អ៊ុក រតនា និពន្ធទំនុកច្រៀង យឹម តាស្រង់ និង យឹម សុជាតា សម្រួលបទភ្លេងដោយលោក ផល វឌ្ឍនៈ
និងបានចំណាយទុកថត MV ជាងមួយពាន់ដុល្លារ៕