រាជធានីភ្នំពេញ៖ ឯកឧត្ដម ប៉ា សុជាតិវង្ស កាលពីល្ងាចថ្ងៃទី២៥ ខែមេសា ឆ្នាំ២០១៧ ម្សិលមិញនេះ បានចេញសារបំភ្លឺមួយពាក់ព័ន្ធរឿងការសាងសង់ស្ពានថ្មើរជើងជម្ពូវន្តបន្ទាប់ពីមានផ្ទុះការរិះគន់ឡើងវិញកាន់តែចាស់ដៃពីសំណាក់ប្រជាពលរដ្ឋនិងមិត្តអ្នកលេងក្នុងបណ្ដាញសង្គមហ្វេសប៊ុក ក្រោយពេលមានក្មេងប្រុសសិស្សសាលាជម្ពូវន្តត្រូវម៉ូតូបុកបណ្ដាលឲ្យសន្លប់កាលពីព្រឹកថ្ងៃ២៤ខែមេសាកន្លងទៅ។
យោងតាមសំណេរដែលបង្ហោះលើគណនីហ្វេសប៊ុកផ្លូវការរបស់អភិបាលរាជធានីភ្នំពេញ បានបកស្រាយយ៉ាងដូច្នេះថា៖ "កម្រាលបេតុងសងខាងផ្លូវជាច្រកចូលចំណត និងចូលលំនៅដ្ឋានរបស់ប្រជាពលរដ្ឋ មិនមែនផ្លូវសម្រាប់យានយន្តធ្វើដំណើរទេ!ក្នុងខណៈពេលនេះ ការដ្ឋានកំពុងដំណើរការសាងសង់ ដែលចំពោះមុខនឹងតម្លើងស្លាកសញ្ញា គូសគំនូសចរាចរ ភ្លើងស្តុប ដើម្បីរៀបចំសុវត្ថិភាពនិងលំហូរចរាចរអោយបានល្អប្រសើរ"។
បើទោះបីជាមានបកស្រាយពីអភិបាលរាជធានីដោយភ្ជាប់ជាមួយរូបថតសំណង់ស្ពាននិងគម្រោងប្លង់ជាដើមក្តី ក៏ប្រជាពលរដ្ឋមួយចំនួនហាក់នៅតែមិនពេញចិត្ត ហើយថែមទាំងលើកឡើងថា ធ្វើខុសគេខុសឯង ដែលកត្តានេះហាក់មិនអាចធានាសុវត្ថិភាពជូនអ្នកថ្មើរជើង ពិសេសសិស្សសាលាដែលបានដើរឆ្លងបាន។
សូមបញ្ជាក់ផងដែរថា នៅថ្ងៃទី២៤ មេសា ប្រមាណជាម៉ោង១០ព្រឹក មុនពេលកើតហេតុ ឯកឧត្ដម ប៉ា សុជាតិវង្សក៏បានចុះពិនិត្យការដ្ឋានសាងសង់ស្ពានអាកាសថ្មើរជើងនិងចិញ្ចើមផ្លូវ ដើម្បីរៀបចំឲ្យមានការកែលម្អនិងសម្រួលឲ្យកាន់តែមានសុវត្ថិភាពបន្ថែមផងដែរ ប៉ុន្តែក្រោយមកនៅម៉ោង១១ព្រឹកដែលជាពេលសិស្សសាលាពីរៀននោះ ក៏ស្រាប់តែមានករណីគ្រោះថ្នាក់ចរាចរណ៍នោះកើតឡើង បណ្ដាលឲ្យកុមារាម្នាក់សន្លប់ រួចក៏ត្រូវក្រុមគ្រួសារដឹកទៅមន្ទីរពេទ្យភ្លាមៗផងដែរ៕
