ព្រះរាជប្រកាសមួយធ្វើឡើងនៅរាជវាំង ទីក្រុងបាងកក ប្រទេសថៃ នាព្រឹកថ្ងៃពុធ ទី១៨ ខែមេសា ឆ្នាំ២០១៧ បានប្រកាសជាសាធារណថា ព្រះសពរបស់អតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត នឹងត្រូវប្រារព្ធព្រះរាជពិធីបូជា នៅថ្ងៃទី២៦ ខែតុលា ឆ្នាំ២០១៧ ខាងមុខនេះ ដែលត្រូវបានតម្ដល់ទុកអស់រយៈពេល ១ឆ្នាំ និង១៣ថ្ងៃ បន្ទាប់ពីព្រះអង្គសោយទិវង្គត នៅក្នុងមន្ទីរពេទ្យទីក្រុងបាងកក។ នេះបើតាមការចុះផ្សាយដោយសារព័ត៌មាន ថៃ kapook។
ការសម្រេចបូជាព្រះមហាក្សត្រខាងលើនេះ គឺសមស្របទៅតាមសេចក្ដីប្រកាសរបស់រាជរដ្ឋាភិបាលថៃ ដែលធ្លាប់បានទាមទារឲ្យតម្កល់ទុកព្រះសពរបស់ព្រះអង្គក្នុងរាជវាំងរយៈពេលមួយឆ្នាំ ទើបអាចប្រារព្ធពិធីបូជាបាន ហើយក្រោយមកព្រះរាជពិធីដ៏ធំជាផ្លូវការនៃការឡើងគ្រងរាជ្យសម្បត្តិរបស់ស្ដេចអង្គថ្មី ក៏នឹងត្រូវរៀបចំឡើងបន្ទាប់គ្នាផងដែរ។
គួររម្លឹកផងដែរថា អតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត បានសោយព្រះទិវង្គតក្នុងជន្មាយុ ៨៨ព្រះវស្សា នៅថ្ងៃទី១៣ ខែតុលា ឆ្នាំ២០១៦ ដោយសារប្រឈួនរ៉ាំរ៉ៃអស់រយៈពេលជាច្រើនឆ្នាំ៕
