ភាពតានតឹងរវាងប្រទេសមហាអំណាចទាំងពីរសហរដ្ឋអាមេរិក និងរុស្ស៊ី កំពុងប្រឈមមុខដាក់គ្នាកាន់តែខ្លាំងឡើងៗ បន្ទាប់ពីអាមេរិកបានបាញ់មីស៊ីលចំនួន ៥៩គ្រាប់ទៅកាន់មូលដ្ឋានអាកាសរបស់ប្រទេសស៊ីរី ប្រឆាំងនឹងប្រធានាធិបតី លោក អាល់ អាសាដ ដែលគាំទ្រដោយរដ្ឋាភិបាលរុស្ស៊ី។ អាមេរិកអះអាងថា មេដឹកនាំស៊ីរី និងរុស្ស៊ី បានប្រើអាវុធគីមីក្នុងការធ្វើសង្គ្រាមប្រយុទ្ធប្រឆាំងក្រុមជ្រុលនិយមរដ្ឋអុីស្លាម (ISIS) សម្លាប់ជនស៊ីវិលរាប់រយនាក់ កាលពីដើមខែមេសាកន្លងមកនេះ។
បើតាមការការចេញផ្សាយរបស់សារព័ត៌មានរុស្ស៊ី (Russia Today) នាពេលថ្មីៗនេះបានឲ្យដឹងថា រដ្ឋលេខាធិការការពារជាតិអាមេរិកលោក ចែម មែត ( Jim Mattis) បានធ្វើការបង្ហាញនូវភស្តុតាង និងការអះអាងជាក់លាក់មួយពីក្រុមយោធាជំនាញរបស់ខ្លួន ដែលមានមូលដ្ឋានក្នុងប្រទេសអាហ្វហ្គានីស្ថានដោយចោទប្រកាន់រដ្ឋាភិបាលរុស្ស៊ីថា ជាអ្នកផ្ដល់សព្វាវុធយោធាធន់ធ្ងន់ជាច្រើន ទៅឲ្យឧទ្ទាមអុីស្លាមអេមីរ៉ាត ឬ ពួកតាលីបង់ (Taliban)។
ទន្ទឹមនឹងនេះ រដ្ឋលេខាធិការការពារជាតិអាមេរិករូបនេះ បានថ្លែងខណៈដែលប្រជុំជាមួយនាយករដ្ឋមន្ត្រីអាហ្វហ្គានីស្ថានលោក (Ashraf Ghani) ដោយសង្កត់ធ្ងន់ថា "ការផ្ដល់ជំនួយជាសព្វាវុធមកពីបរទេស គឺជាអំពើខុសឆ្គងមួយដ៏ធ្ងន់ធ្ងរ និងបំពានច្បាប់អន្តរជាតិ។ ទីក្រុងវ៉ាស៊ីងតោននឹងចូលរួមប្រជុំជាមួយរដ្ឋាភិបាលរុស្ស៊ី ហើយប្រសិនប្រទេសមហាអំណាចមួយនេះ ពិតជាបានធ្វើសកម្មភាពផ្ទុយនឹងច្បាប់អន្តរជាតិនោះ មហាអំណាចទាំងពីរនឹងត្រូវប្រឈមមុខដាក់គ្នាជាក់ជាមិនខាន”។
គួរបញ្ជាក់ថា បើតាមការអះអាងរបស់មន្ត្រីយោធាជាន់ខ្ពស់អាមេរិកបានរាយការណ៍ថា រដ្ឋាភិបាលទីក្រុងមូស្គូបានផ្ដល់កាំភ្លើងយន្ត និងកាំភ្លើងធន់មធ្យមផ្សេងៗទៀត ទៅឲ្យក្រុមឧទ្ទាមអុីស្លាម អេមីរ៉ាត (Taliban) ដែលមានមូលដ្ឋានទ័ពជាច្រើនកន្លែង ក្នុងប្រទេសអាហ្វហ្គានីស្ថាន ប៉ុន្តែត្រូវបានរដ្ឋាភិបាលទីក្រុងមូស្គូបដិសេធថា វាពុំមានភស្តុតាងច្បាស់លាស់នោះឡើយ៕
