ខេត្តកណ្តាល ៖ មានករណីគ្រោះថ្នាក់ចរាចរណ៍មួយ បានកើតឡើងបណ្តាលឲ្យ មនុស្សប្រុសស្រី២នាក់ រងរបួសធ្ងន់ស្រាល ដោយសាររថយន្ត បើកបុកពេញមួយទំហឹង ខណៈកំពុងជិះម៉ូតូ ។ ហេតុការណ៍បានកើតឡើង កាលពីវេលាម៉ោង ៦និង៣០នាទីព្រឹក ថ្ងៃទី២៩ ខែមេសា ឆ្នាំ២០១៧ ត្រង់ចំណុចចន្លោះគីឡូម៉ែត្រលេខ២៤-២៥ តាមបណ្តោយផ្លូវជាតិលេខ២ ស្ថិតក្នុងភូមិសៀមរាប ឃុំសៀមរាប ស្រុកកណ្តាលស្ទឹង ខេត្តកណ្តាល ។
រថយន្តបង្កម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2X-2573 បើកបរដោយឈ្មោះ អ៊ឹម ហ៊ឺន ភេទប្រុស អាយុ៣៧ឆ្នាំ មានទីលំនៅភូមិស្វាយខាងលិច ឃុំគោកត្រប់ ស្រុកកណ្តាលស្ទឹង ។ ភាគីរងគ្រោះ ជិះម៉ូតូម៉ាក ហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កណ្តាល1S-6877 បើកបរដោយឈ្មោះ ពុំ ពិសិដ្ឋ ភេទប្រុស អាយុ២៤ឆ្នាំ (រងរបួសស្រាល) និងអ្នករួមដំណើរម្នាក់ឈ្មោះ ឡាច ចុម ភេទស្រី អាយុ៦៨ឆ្នាំ (រងរបួសធ្ងន់) រស់នៅភូមិក្រាំងស្បូវ ឃុំព្រះពុទ្ធ ស្រុកកណ្តាលស្ទឹង ជាមួយគ្នា។
ប្រភពបានប្រាប់ថា នៅមុនពេលកើតហេតុ សាក្សីបានឃើញ រថយន្តបង្កបើកបរ តាមបណ្តោយផ្លូវលំ ក្នុងទិសដៅពីលិចទៅកើត ហើយបានបត់ឡើង ទៅលើផ្លូវជាតិលេខ២ ដោយខ្វះការប្រុងប្រយ័ត្ន ទើបបណ្តាលឲ្យជ្រុលទៅបុកម៉ូតូជនរងគ្រោះ ដែលកំពុងជិះក្នុងទិសដៅពីជើងទៅត្បូង ដួលបោកទៅលើផ្លូវជាតិធ្វើឲ្យរងរបួសធ្ងន់ស្រាលតែម្តង ។
ក្រោយពីមានហេតុការណ៍ កើតឡើង អ្នកបើកបររថយន្ត រួមជាមួយមធ្យោបាយ ពាក់ព័ន្ធទាំង២គ្រឿង ត្រូវបានសមត្ថកិច្ចឃាត់ខ្លួនបណ្តោះអាសន្ន បញ្ជូនទៅកាន់អធិការដ្ឋាននគរបាលស្រុក ។ ចំណែកឯជនរងគ្រោះ ត្រូវបានបញ្ជូនទៅសង្គ្រោះ នៅមណ្ឌលសុខភាព ឃុំសៀមរាប ៕ ដោយ VD7
