ស្ពានឆ្លងកាត់ដៃសមុទ្ររបស់ ចិន មានចម្ងាយរហូតដល់ ៥៥ គីឡូម៉ែត្រ
ស្ពានឆ្លងកាត់ទីក្រុង ហុងកុង ចូហៃ នៃខេត្ត ក្វាងទុង និងទីក្រុង ម៉ាកាវ មានចម្ងាយ ៥៥ គីឡូម៉ែត្រ ចូលដល់ដំណាក់កាលសំខាន់នៃគម្រោងទ្រង់ទ្រាយធំរបស់ប្រទេស ចិន ក្នុងបំណងភ្ជាប់ទីក្រុងទាំង ៣ តាមរយៈមហាវិថី ផ្លូវក្រោមដី និងស្ពានតែមួយ ហើយគម្រោងនេះនឹងចប់សព្វគ្រប់ត្រឹមចុងឆ្នាំ ២០១៧ ។
ផ្នែកសំខាន់មួយនៃប្រព័ន្ធតភ្ជាប់ទីក្រុងទាំង ៣ គឺផ្លូវក្រោមដីភ្ជាប់ទីក្រុង ចូហៃ ជាមួយនឹងស្ពានឆ្លងកាត់ដៃសមុទ្រ ។ គម្រោងទ្រង់ទ្រាយធំនេះ ត្រូវប្រើប្រាស់បច្ចេកវិទ្យាថ្មីៗច្រើនបែប ដោយវិស្វករនិយាយថា នេះគឺជាផ្លូវក្រោមដីដែលពិបាកសាងសង់បំផុតលើពិភពលោក ។ បច្ចេកវិទ្យាមួយក្នុងចំណោមបច្ចេកវិទ្យាសំខាន់ៗជាច្រើនគឺ ការជីករោងជម្រៅ ២២៥ ម៉ែត្រ សម្រាប់ផ្នែកមួយនៃផ្លូវក្រោមដី ដើម្បីការពារកុំឲ្យជ្រាបទឹកពីស្រទាប់ដីខ្សាច់ដែលសម្បូរទឹក ។
វិស្វករបានសាងសង់សំណង់ក្រោមដីមួយ មានបំពង់ពិសេសចំនួន ៣៦ មានមុខកាត់ជិតពីរម៉ែត្រ និងមានប្រវែង ២២៥ ម៉ែត្រ ដែលមានតួនាទីធ្វើឲ្យដីកករឹង ទើបវិស្វករអាចធ្វើការជីកដីបាន ។ នៅពេលសាងសង់រួចរាល់ ការធ្វើដំណើរនឹងឆាប់រហ័សជាងមុនមួយម៉ោង ៣០ នាទី ចន្លោះពីទីក្រុង ចូហៃ ទៅ ហុងកុង ដែលកន្លងមកត្រូវប្រើពេល ៣ ម៉ោង ។
