ខេត្តព្រះវិហារ៖ បុរស២នាក់បានរងការបាញ់ប្រហារពីជនមិនស្គាល់អត្តសញ្ញាណ បណ្ដាលឲ្យស្លាប់ម្នាក់ និងរបួសធ្ងន់ម្នាក់កាលពីវេលាម៉ោង៧និង៤០នាទីយប់ ថ្ងៃទី១០ មេសា ឆ្នាំ២០១៧នេះដែលស្ថិតនៅភូមិការឡោត ឃុំសង្កែពី ស្រុកឆែប ខេត្តព្រះវិហារ។
ប្រភពពីសមត្ថកិច្ចថា ជនរងគ្រោះទី១-ឈ្មោះ វ៉ាន់ វ៉ៃ ភេទប្រុស អាយុ១៨ឆ្នាំ រស់នៅភូមិជោគជ័យ ឃុំសង្កែរពី ស្រុកឆែប ខេត្តព្រះវិហារ រងរបួសធ្ងន់ត្រង់ចង្កេះ។ ទី២-ឈ្មោះ ឈុន រី ភេទប្រុស អាយុ១៧ឆ្នាំរស់នៅភូមិឃុំដូចជាមួយគ្នា រងរបួសចំគល់ចង្កេះ និងឆ្អឹងជំនី«ស្លាប់ភ្លាមនៅកន្លែង»។
សមត្ថកិច្ចបន្តថា ករណីនេះគឺបាញ់ដោយអាវុធ(កែឆ្នៃ)ប្រភេទ( កាប៉ិន) បច្ចុប្បន្នជនរងគ្រោះស្លាប់ ត្រូវបានសមត្ថកិច្ចប្រគល់ឲសាច់ញាតិធ្វើបុណ្យតាមប្រពៃណី។ ចំណែកជនរងគ្រោះរបួសធ្ងន់ ត្រូវបញ្ជូនមកសង្គ្រោះបន្ទាន់នៅមន្ទីរពេទ្យ៕ ដោយ៖ (ម៉ែន សុគន្ធា)
