អ្នកភូមិក្នុងតំបន់ សេយ៉ុងជូ ខេត្ត ក្យេយ៉ុងសាង ប្រទេស កូរ៉េខាងត្បូង សម្ដែងការខឹងសម្បារនៅពេលដែលប្រព័ន្ធការពារមីស៊ីលរបស់ អាមេរិក ត្រូវបានបញ្ជូនទៅដល់ទីនោះ ដើម្បីដំឡើងក្រោមផែនការរបស់រដ្ឋាភិបាលនៃប្រទេសទាំងពីរ ដោយអ្នកភូមិបានចេញមកតវ៉ានៅតាមដងផ្លូវ ប្រឆាំងនឹងការដាក់ពង្រាយប្រព័ន្ធការពារមីស៊ីលទាំងនោះ ។
អ្នកភូមិនិយាយថា ភូមិរបស់ពួកគេមានប្រជាជនរស់នៅត្រឹមតែជាង ១០០ នាក់ប៉ុណ្ណោះ ប៉ុន្តែអាជ្ញាធរបានដាក់ពង្រាយកងកម្លាំងប៉ូលិសរហូតដល់ជិតមួយពាន់នាក់ ក្នុងពេលដឹកជញ្ជូនប្រព័ន្ធការពារមីស៊ីល ហើយប៉ូលិសខ្លះឈរនៅមុខផ្ទះនិងមិនឲ្យប្រជាជនចេញពីផ្ទះ ដែលធ្វើឲ្យប៉ះពាល់ដល់សិទ្ធិ សេរីភាពរបស់ប្រជាជនក្នុងតំបន់ ។ ប្រជាជនអះអាងថា ប្រព័ន្ធការពារមីស៊ីលមិនអាចធ្វើឲ្យមានសន្តិភាពឡើយ គឺមានតែនាំឲ្យមានសង្គ្រាមប៉ុណ្ណោះ ដូច្នេះពួកគេទាមទារកុំឲ្យដំឡើងប្រព័ន្ធអាវុធនេះក្នុងតំបន់របស់ពួកគេ ។
សូមបញ្ជាក់ថា ប្រព័ន្ធការពារមីស៊ីល ចាប់ផ្ដើមបញ្ជូនទៅដល់ប្រទេស កូរ៉េខាងត្បូង កាលពីខែ មិនា ប៉ុន្តែ អាមេរិក និង កូរ៉េខាងត្បូង ស្ទាក់ស្ទើរនៅមិនទាន់ពិភាក្សាអំពីដំណើរការដំឡើងប្រព័ន្ធការពារមីស៊ីលទាំងនោះ ដោយសារបេក្ខភាពប្រធានាធិបតី កំពុងជជែកដេញដោលមុនពេលការបោះឆ្នោតជ្រើសរើសប្រធានាធិបតី កូរ៉េខាងត្បូង នៅថ្ងៃទី ៩ ខែ ឧសភា ។
ប្រភពៈ cgtn