នាវាផ្ទុកយន្តហោះ USS Carl Vinson ចូលដែនទឹកឧបទ្វីបកូរ៉េគឺជាការពិត យន្តហោះចម្បាំង F-35 សម្ដែងអនុភាពនៅលើឧបទ្វីបកូរ៉េគឺជាការពិត ចំណែកទាហាន អាមេរិក ២ ម៉ឺន ៩ ពាន់នាក់ កំពុងស្ថិតនៅលើទឹកដី កូរ៉េខាងត្បូង ក៏ជាការពិត ប៉ុន្តែ អាមេរិក វាយប្រហារ កូរ៉េខាងជើង ដោយប្រើកម្លាំងទាំងនោះមិនពិតឡើយ ព្រោះបើវាយប្រហារ អ្វីៗត្រូវចេញពីរដ្ឋ មីសូរី (Missouri) ។
ការវាយប្រហារ កូរ៉េខាងជើង ប្រាកដជាធ្វើឡើងដោយយន្តហោះទម្លាក់គ្រាប់បែកពាសដោយដែកថែប អាចនាំយកគ្រាប់បែកធំបំផុតមិនមែននុយក្លេអ៊ែររបស់ អាមេរិក ដែលបានផលិតតាំងពីទសវត្សឆ្នាំ ១៩៩០ ក្នុងអាណត្តិលោក ប៊ីល ក្លិនតុន ។ ការពិតរដ្ឋាភិបាល អាមេរិក បានត្រៀមរៀបចំការវាយប្រហារទីតាំងយោធាក្រោមដី កូរ៉េខាងជើង តាំងពីទសវត្សឆ្នាំ ១៩៩០ បំណងបន្ទច់បង្អាក់ ឬយ៉ាងហោចពន្យឺតដល់ដំណើរការអភិវឌ្ឍកម្មវិធីនុយក្លេអ៊ែរ ។
ផែនការនាពាក់កណ្ដាលទសវត្សឆ្នាំ ១៩៩០ គឺទម្លាក់គ្រាប់បែកដែលមានអនុភាពជ្រៀតចូលទៅក្នុងដីហើយមានកម្លាំងផ្ទុះមហាសាលអាចបំផ្លាញទីតាំងយោធាក្រោមដីដ៏ជ្រៅ និងរឹងមាំ ។ ផែនការនោះត្រូវបានពន្លឿនកាន់តែខ្លាំងនៅដើមទសវត្សឆ្នាំ ២០០០ ក្រោមរដ្ឋបាលលោក George W. Bush ដែលមានគោលនយោបាយវាយប្រហារឲ្យបានមុនសត្រូវ ។
ឆ្នាំ ២០០២ រដ្ឋមន្ត្រីការពារជាតិ អាមេរិក Donald Rumsfeld បញ្ជាដល់មន្ទីរបញ្ចកោណឲ្យបង្កើតផែនការមួយឈ្មោះ OPLAN 5027 សម្រាប់សង្គ្រាមនៅ កូរ៉េខាងជើង ផ្ដោតទៅលើការវាយឆ្មក់តាមអាកាសទៅលើទីតាំងនុយក្លេអ៊ែរ ដោយប្រើប្រាស់គ្រាប់បែកនុយក្លេអ៊ែរអាចមុជចូលទៅក្នុងដី ហើយផ្ទុះក្រោមដី ប៉ុន្តែព្រឹទ្ធសភា អាមេរិក ស្ទាក់ស្ទើរមិនចង់ឲ្យប្រើប្រាស់គ្រាប់បែកនុយក្លេអ៊ែរ ថែមទាំងអ្នកជំនាញអះអាងថា រលកវិទ្យុសកម្មនឹងបញ្ចេញមកក្រៅដោយសាររំញ័រដ៏ខ្លាំងក្លា ហេតុនេះទើបសភាអនុញ្ញាតឲ្យប្រើប្រាស់គ្រាប់បែកមិនមែននុយក្លេអ៊ែរ ។
ដោយសារមិនអាចប្រើប្រាស់នុយក្លេអ៊ែរ ឆ្នាំ ២០០៤ មន្ទីរបញ្ចកោណចាប់ផ្ដើមអភិវឌ្ឍគ្រាប់បែក MOP មានទម្ងន់ ១៥ តោន ឌីហ្សាញជាពិសេសសម្រាប់បំផ្លាញទីតាំងក្រោមដីក្នុងប្រទេស អ៊ីរ៉ង់ និង កូរ៉េខាងជើង ប៉ុណ្ណោះ ។ ឆ្នាំ ២០១១ គ្រាប់បែក MOP រៀបចំរួចរាល់សម្រាប់ធ្វើសកម្មភាព ។ យន្តហោះទម្លាក់គ្រាប់បែកពាសដោយដែកថែមមួយគ្រឿង អាចនាំយកគ្រាប់បែកមានប្រវែងជាង ៦ ម៉ែត្រចំនួនពីរគ្រាប់ ។
ដូច្នេះទោះជាលោក ដូណាល់ ត្រាំ គំរាម និងបញ្ជូនក្រុមនាវាប្រយុទ្ធទៅ កូរ៉េ ក៏ដោយ ប៉ុន្តែការវាយប្រហារនឹងកើតឡើងលុះត្រាតែ អាមេរិក បញ្ចេញយន្តហោះទម្លាក់គ្រាប់បែកពាសដោយដែកថែប និងយន្តហោះទម្លាក់គ្រាប់បែក B-2 ចេញពីមូលដ្ឋានទ័ពអាកាស ក្នុងរដ្ឋ មីស៊ូរី ជាកន្លែងរក្សាទុកគ្រាប់បែក MOP ឬបញ្ជូនទាហានថ្មើរជើងឆ្លងព្រំដែនចូល កូរ៉េខាងជើង ប៉ុណ្ណោះទើបអាចជាការពិត ។
ប្រភពៈ thedailybeast
