រាជធានីភ្នំពេញ៖ ស្របពេលដែល ពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងចូលមកដល់នៅប្រមាណ១សប្ដាហ៍ខាងមុខនេះ រាជរដ្ឋាភិបាលកម្ពុជា ដែលមានគណៈកម្មាធិការជាតិសុវត្ថិភាពចរាចរណ៍ផ្លូវគោកជាសេនាធិការជំនាញបានចេញសារអំពាវនាវមួយដល់ប្រជាពលរដ្ឋ ពិសេសអ្នកប្រើប្រាស់ផ្លូវថ្នល់ទាំងអស់ ប្រុងប្រយ័ត្នខ្ពស់និងគោរពច្បាប់ ដើម្បីចូលរួមកាត់បន្ថយគ្រោះចរាចរណ៍។
ក្នុងសេចក្តីអំពាវនាវនេះក៏បានប្រាប់វិធីបង្ការនិងទប់ស្កាត់មួយចំនួនផងដែរ ដើម្បីធ្វើឲ្យអ្នកបញ្ជាយានយន្តទាំងអស់ទទួលបាលសុវត្ថិភាពខ្ពស់ និងបានជួបជុំបងប្អូនក្រុមគ្រួសារបង្កបរិយាកាសសប្បាយរីករាយក្នុងឱកាសពិធីបុណ្យចូលឆ្នាំថ្មី។ ក្នុងវិធីបង្ការទាំងនោះ រួមមានដូចក្រោម៖
- ត្រួតពិនិត្យបច្ចេកទេសយានយន្តជានិច្ចដូចជា ហ្វ្រាំង សំបកកង់ ចង្កូត និងភ្លើងបំភ្លឺជាដើម។
- សូមកុំផ្ទុកអ្នកដំណើរឬទំនិញលើសចំណុះ
- ត្រូវពាក់មួកនិងខ្សែសុវត្ថិភាពជានិច្ចក្នុងពេលធ្វើដំណើរ
- គោរពសិទ្ធិអាទិភាព គំនូសសញ្ញាចរាចរណ៍និងប្រកាន់ស្តាំជានិច្ច
- មិនត្រូវបើកបរលើសល្បឿនកំណត់និងក្រោមឥទ្ធិពលជាតិស្រវឹងឬងងុយដេកជាដាច់ខាត
- មិនត្រូវបត់ឬ ជែងក្នុងស្ថានភាពប្រថុយប្រថានជាដាច់ខាត
- សូមបើកបរក្នុងស្មារតីប្រុងប្រយ័ត្នជានិច្ចនិងប្រកបដោយការអធ្យាស្រ័យគ្នា.
