រុស្ស៊ី ផលិតបាននាវាមុជទឹកមានអនុភាពខ្លាំងបំផុតនាពេលបច្ចុប្បន្ន ដើរដោយថាមពលនុយក្លេអ៊ែរ មានកម្លាំង ៤ ម៉ឺន ៣ ពាន់សេះ មានល្បឿនរហូតដល់ ៥៧ គីឡូម៉ែត្រក្នុងមួយម៉ោង បំពាក់ដោយគ្រាប់បាញ់ក្រោមទឹក (torpedo) ៣០០ គ្រាប់ បំពាក់មីស៊ីល Oniks និងមីស៊ីល Kalibr ចំនួន ៨ គ្រាប់ មាននាវិក ៩០ នាក់ អាចស្ថិតនៅក្នុងទឹក ១០០ ថ្ងៃ និងអាចមុជក្នុងជម្រៅ ៦០០ ម៉ែត្រ ។
នាវាមុជទឹក Kazan មានប្រវែង ១៣៩ ម៉ែត្រ ស្ថិតក្នុងក្រុមនាវាមុជទឹក Yasen ត្រូវបានឌីហ្សាញឡើងដើម្បីបំផ្លាញនាវាមុជទឹកសត្រូវ នាវាលើទឹក និងមូលដ្ឋានទ័ពអាកាស ព្រមទាំងគោលដៅដទៃទៀត អាចបាញ់ចំគោលដៅឥតខ្ចោះក្នុងចម្ងាយ ២៤០០ គីឡូម៉ែត្រ ។ មេបញ្ជាការ រុស្ស៊ី អះអាងថា Kazan ជានាវាមុជទឹកដែលសត្រូវពិបាកតាមដានបំផុត ដោយសារតែសំឡេងរបស់វាស្ងាត់ ក្រោមការឌីហ្សាញនាវាមុជទឹកប្រើថាមពលនុយក្លេអ៊ែរជំនាន់ថ្មី ។ ទោះយ៉ាងណា Kazan នឹងត្រូវបានដាក់ឲ្យបម្រើសម្រាប់កងទ័ពជើងទឹកនៅឆ្នាំក្រោយ ហើយប្រទេស រុស្ស៊ី នឹងបន្តធ្វើឲ្យកងទ័ពជើងទឹកមាននាវាមុជទឹក ៧ គ្រឿង ត្រឹមឆ្នាំ ២០២៣ ។
កងទ័ព រុស្ស៊ី ចាប់ផ្ដើមពង្រឹងអនុភាពឡើងវិញ ដោយសារតែភាពតានតឹងជាមួយនឹងបស្ចិមប្រទេស ពាក់ព័ន្ធជម្លោះ អ៊ុយក្រែន បង្ខំឲ្យ រុស្ស៊ី ត្រូវតែធ្វើទំនើបកម្មសព្វាវុធគ្រប់ផ្នែក បន្ទាប់ពីបានបោះបង់ចោលគម្រោងសាងសង់នាវាចម្បាំងជាច្រើនដោយសារតែខ្វះធនធាន ក្រោយការដួលរលំនៃ សហភាពសូវៀត ក្នុងឆ្នាំ ១៩៩១ ។
ប្រភពៈ independent
