សិល្បៈ ៖ តារាសម្ដែង ម៉ូដែល និងពិធីការិនី មាន សូនីតា គ្រោងចេញទៅសម្ដែងនៅប្រទេសជប៉ុនក្នុងថ្ងៃទី៣០ ខែមេសាខាងមុខនេះ ហើយកញ្ញាបានប្រាប់ថា ដំណើរចេញសម្ដែងក្រៅស្រុកលើកនេះនាងក៏បានវេចខ្ចប់សំលៀកបំពាក់ និងផលិតផលផ្សេងៗធ្វើពីក្រមាសូត្រខ្មែរទៅលក់ ដើម្បីរកថវិកាមកជួយផ្គត់ផ្គង់ដល់សមាគមស្ត្រីតម្បាញក្រមាសូត្រនៅខេត្តបន្ទាយមានជ័យផងដែរ។
ក្នុងពិធីសន្និសីទកាសែតកាលពីពេលថ្មីៗនេះរាជិនីក្រមាខ្មែរកញ្ញា មាន សូនីតា បានប្រាប់ថា នាងរួមជាមួយសិល្បករចំនួនបួនផ្សេងទៀតមានលោក ព្រាប សុវត្តិ អ្នកនាង ម៉ែង កែវពេជ្ជតា លោក អ៊ាម វន្នី និងលោក សូ ស្រណោះ គ្រោងចេញទៅសម្ដែងនៅប្រទេសជប៉ុននៅថ្ងៃទី៣០មេសាខាងមុខក្នុងកម្មវិធី "ពិព័រណ៍ពាណិជ្ជកម្មកម្ពុជា២០១៧ នៅប្រទេសជប៉ុន" ដែលមានរយៈពេលមួយសប្ដាហ៍។
តារារូបនេះបន្តថា ការចេញដំណើរទៅប្រទេស ជប៉ុន លើកនេះ ក្រៅពីការសម្ដែងជូនបងប្អូនខ្មែរ និងជនបរទេសបានទស្សនាពីសិល្បៈរបស់ខ្មែរ នាងក៏បាននាំយកសំលៀកបំពាក់ និងផលិតផលប្រើប្រាស់ផ្សេងៗច្នៃពីក្រមាជិតមួយរយម៉ូដយកទៅលក់ ដើម្បីរកថវិកាមកជួយគាំទ្រដល់ដំណើរការផលិត និងតម្បាញរបស់សមាគមស្ត្រីនៅខេត្តបន្ទាយមានជ័យផងដែរ។
មាន សូនីតា បន្តថា កម្មវិធីពិព័រណ៍នេះគឺអ្នករៀបចំកម្មវិធីគេទុក្ខស្តង់(តូបលក់)ឲ្យនាងមួយសម្រាប់ដាក់តាំងលក់ក្រមា និងផលិតច្នៃពីក្រមាជាច្រើនទៀត ហើយការដាក់តាំងលក់នៅក្រៅស្រុកលើកនេះ គឺជាលើកទីមួយសម្រាប់ផលិតក្រមារបស់នាង ដែលកំពុងមានការគាំទ្រពីសំណាក់បងប្អូនខ្មែរទាំងក្នុង និងក្រៅស្រុក។
ដោយឡែកសម្រាប់ការរំពឹងទទួលបានការគាំទ្រកម្រិតណានោះ មាន សូនីតា ប្រាប់ថា នាងមិនទាន់ហ៊ានសន្និដ្ឋានទេ ព្រោះការងារនេះជាលើកដំបូង ហើយនាងក៏មិនទាន់បានដឹងច្បាស់ថា កម្មវិធីខាងលើនេះមានបងប្អូនខ្មែរចូលរួមមានចំនួនប៉ុន្មាននៅឡើយ៕
