រដ្ឋមន្ត្រីការពារជាតិ សហរដ្ឋអាមេរិក លោក ជីម ម៉ាទីស និយាយថា នាវាផ្ទុកយន្តហោះ សហរដ្ឋអាមេរិក USS Carl Vinson នៅតែបន្តបេសកកម្មទៅកាន់ឧបទ្វីបកូរ៉េ ដោយនាវាកំពុងធ្វើដំណើរឆ្ពោះទៅទិសខាងជើង ចេញពីអាស៊ីអាគ្នេយ៍ ហើយនឹងទៅដល់ដែនទឹកនៃឧបទ្វីបកូរ៉េនៅសប្ដាហ៍ក្រោយ ។ លោក ម៉ាទីស បញ្ជាក់ដូច្នេះ អំឡុងទស្សនកិច្ចទៅកាន់ប្រទេស អារ៉ាប៊ីសាអ៊ូឌីត ។
រដ្ឋបាលលោក ដូណាល់ ត្រាំ បដិសេធចំពោះការបន្ទោសថា ទីក្រុង វ៉ាស៊ីនតោន ធ្វើសកម្មភាពខុស ពាក់ព័ន្ធនឹងការបញ្ជូនក្រុមនាវាប្រយុទ្ធទៅឧបទ្វីបកូរ៉េ ។ លោក ម៉ាទីស បញ្ជាក់ថា ការដាក់ពង្រាយនាវាប្រយុទ្ធនឹងបន្ថែមរយៈពេល ៣០ ថ្ងៃបន្ថែមទៀត នៅលើដែនទឹកនៃឧបទ្វីបកូរ៉េ ដោយសារតែការព្រួយបារម្ភចំពោះសន្តិសុខរបស់សម្ព័ន្ធមិត្តទ្វីបអាស៊ី និងរង់ចាំរហូតដល់ប្រទេស កូរ៉េខាងត្បូង បញ្ចប់ការបោះឆ្នោតជ្រើសរើសប្រធានាធិបតី នៅថ្ងៃទី ៩ ខែ ឧសភា ខាងមុខនេះ ។
USS Carl Vinson ធ្លាប់ចូលរួមសមយុទ្ធ អាមេរិក-កូរ៉េខាងត្បូង ទ្រង់ទ្រាយធំបំផុត ចូលរួមដោយទាហានប្រមាណ ៣០ ម៉ឺននាក់ មានយន្តហោះផ្លេកបន្ទោរ F-35B របស់ទាហាន ម៉ារីន អាមេរិក យន្តហោះប្រយុទ្ធ Joint Strike Fighters និងជាពេលដែលសាកល្បងប្រើប្រាស់ប្រព័ន្ធការពារមីស៊ីល ព្រមទាំងកងកម្លាំងប្រតិបត្តិការពិសេស ។ មានសេចក្ដីរាយការណ៍ថា ក្រុមសមរភូមិពិសេសរបស់កងទ័ពជើងទឹក ឬក្រុម SEAL ទី៦ នឹងចូលរួមផងដែរ ប៉ុន្តែមន្ទីរបញ្ចកោណបដិសេធចំពោះព័ត៌មាននោះ ។
មេបញ្ជាការ អាមេរិក និយាយថា វត្តមានរបស់នាវាផ្ទុកយន្តហោះ Carl Vinson គឺជាបេសកកម្មសំខាន់មួយអំពីរបៀបដែល កូរ៉េខាងត្បូង និង សហរដ្ឋអាមេរិក បន្តលើកកម្ពស់សមត្ថភាពកងទ័ពនៃប្រទេសទាំងពីរ ដើម្បីធានាសន្តិសុខ និងស្ថិរភាពនៅលើឧបទ្វីបកូរ៉េ រហូតដល់ក្នុងតំបន់ទាំងមូល ។
