ខ្សែបម្រើ Real Madrid កីឡាករ James Rodriguez ត្រូវបានគេរាយការណ៍ថា បានជ្រើសរើសលេខអាវរបស់ខ្លួននៅក្លឹប Manchester United រួចទៅហើយនេះបើតាមប្រភព The Express របស់អង់គ្លេសបកប្រែពី Don Balon របស់ទស្សនាវដ្ដីកីឡាប្រចាំថ្ងៃរបស់អេស្ប៉ាញ។
កីឡាករជម្រើសជាតិកូឡុំប៊ីមានព័ត៌មានជាប់ទាក់ទងផ្ទេរចេញពីទីក្រុង Madrid ក្នុងរដូវកាលនេះ បន្ទាប់ពីមិនបានជាប់ជម្រើសដំបូងក្រោមការដឹកនាំរបស់ Zinedine Zidane ។ ខណៈពេលដែលក្លឹបនៅតំបន់អឺរ៉ុបចង់ចុះហត្ថលេខាជាមួយគាត់ ប្រភពមកពីប្រទេសអេស្ប៉ាញសន្និដ្ឋានថា គាត់បានសម្រេចចិត្តប្ដូរមកលេងនៅក្លឹបបិសាចក្រហមរួចទៅហើយ ទោះបីជាគាត់ធ្លាប់អះអាងថាមិនចេញពី Real Madrid ។
ទស្សនាវដ្ដីរបស់អេស្ប៉ាញ Don Balonដែលបោះពុម្ពជារៀងរាល់សប្ដាហ៍បញ្ជាក់ថា Jose Mourinho បានយល់ព្រមឲ្យកិច្ចព្រមព្រៀងនេះកើតឡើងរួចទៅហើយ។ ពួកគេថែមទាំងសន្និដ្ឋានពីការយល់ព្រមរបស់ James ទៅលេងនៅ Red Devils ដោយឈានទៅដល់ជំហានជ្រើសរើសអាវនៅ Man Utd ទៀតផង។
ហើយខ្សែបម្រើប្រយុទ្ធរូបនេះ នឹងអាចទទួលបានអាវលេខ១០ជំនួស Rooney ដែលមានអនាគតមិនច្បាស់លាស់នៅ Old Trafford ផងនោះ។ ប្រធានក្រុមជម្រើសជាតិអង់គ្លេស អាចនឹងដល់ពេលបញ្ចប់អាជីពនៅ Man Utd ដោយសារតែមិនមានពេលវេលាសមស្របក្នុងការចូលលេង។
Rooney ដែលគេដឹងថានៅមានសមត្ថភាពខ្ពស់ក្នុងលេងបាល់នៅឡើយ ក៏ត្រូវបានគេដឹងថាអាចនឹងប្ដូរទៅលេងនៅចិន ក្លឹបមួយចំនួននៅអាមេរិក ពិសេសក្លឹបដំបូងរបស់គេគឺ Everton។ កីឡាករវ័យ៣១ឆ្នាំនៅសល់កុងត្រាជាមួយ Man Utd ដល់ឆ្នាំ ២០១៩៕