រាជធានីភ្នំពេញ៖ មិត្តចិន សម្រេចផ្តល់ជំនួយនិងហិរញ្ញប្បទានឥតសំណងចំនួនជិត ១៧០០ លានយ័ន ស្មើនឹងប្រមាណជិត២៥០លានដុល្លារ ដល់កម្ពុជា សម្រាប់កសាងសាលារៀន កសាងបណ្តាញគមនាគមន៍ជនបទ និងពង្រីកសមត្ថភាពរបស់មន្ទីរពេទ្យយោធាកម្ពុជា ដើម្បីជួយដល់អតីតយុទ្ធជន និងប្រជាពលរដ្ឋទូទៅ។
ការសម្រេចផ្តល់នេះ បានធ្វើឡើងនៅក្នុងជំនួបពិភាក្សាទ្វេភាគីរវាង សម្ដេចតេជោ និង ឯកឧត្ដម ស៊ី ជិនពីង ប្រធានាធិបតីចិននៅថ្ងៃទី១៧ ខែឧសភា ឆ្នាំ២០១៧ ដែលបានធ្វើឡើងនៅផ្ទះសំណាក់រដ្ឋ ក្នុងទីក្រុងប៉េកាំង។
ក្នុងជំនួបនេះ ឯកឧត្តមប្រធានាធិបតីមានប្រសាសន៍វាយតម្លៃខ្ពស់ ចំពោះគណៈកម្មាធិការអន្តររដ្ឋាភិបាលនៃប្រទេសទាំងពីរ ដែលមានភាពជោគជ័យលើការងារជាច្រើន ក្នុងទំនាក់ទំនងទ្វេភាគី ពិសេសការអនុវត្តនូវគំនិតផ្ដួចផ្ដើមស្តីពីខ្សែក្រវ៉ាត់និងផ្លូវ។
ឯកឧត្តមក៏បានផ្តល់នូវសេចក្តីសង្ឃឹមថា នៅឆ្នាំ២០២០ខាងមុខ ទំហំពាណិជ្ចកម្មនៃប្រទេសទាំងពីរនឹងមានការកើនឡើងរហូតដល់ ៦ពាន់លានដុល្លារអាមេរិក ហើយនៅឆ្នាំ២០១៨ខាងមុខនេះភាគីចិននឹងទទួលការទិញអង្ករពីប្រទេសកម្ពុជា ចំនួន៣០ម៉ឺនតោន រួមទាំងការជួយកសាងឃ្លាំងអង្ករក្នុងប្រទេសកម្ពុជា។
ឯកឧត្តមក៏បានគូសបញ្ជាក់ដែរថា ឯកឧត្តមនឹងជំរុញឲ្យមានការសាងសង់ផ្លូវល្បឿនលឿនពីរាជធានីភ្នំពេញទៅកាន់ខេត្តព្រះសីហនុ កសាងតំបន់សេដ្ឋកិច្ចពិសេសក្នុងខេត្តព្រះសីហនុ និងសាងសង់ព្រលានយន្តហោះអន្តរជាតិថ្មីនៅខេត្តសៀមរាប ព្រមទាំងសម្រេចផ្តល់ជំនួយឥតសំណង១ពាន់២០០លានយ័ន (ប្រមាណជាង១៧៤លានដុល្លារ) ដល់កម្ពុជា ដើម្បីឲ្យភាគីកម្ពុជាកសាងសាលារៀន កសាងបណ្តាញគមនាគមន៍ជនបទ ជីកអណ្តូងទឹកស្អាត។
ជាមួយគ្នានេះចិននឹងផ្តល់ហិរញ្ញប្បទានឥតសំណងចំនួន ៤៥០លានយ័ន ក្នុងឆ្នាំ២០១៧ ជួយពង្រីកសមត្ថភាពរបស់មន្ទីរពេទ្យយោធាកម្ពុជា ដើម្បីជួយដល់អតីតយុទ្ធជន និងប្រជាពលរដ្ឋទូទៅ។
ឯកឧត្តមបន្តថា នៅឆ្នាំ២០២០នឹងមានភ្ញៀវទេសចរចិនទៅទស្សនាប្រទេសកម្ពុជាចំនួន២លាននាក់ ដោយសារប្រទេសកម្ពុជាមានប្រាង្គប្រាសាទដ៏ល្បីល្បាញ ហើយក្នុងនោះភរិយារបស់ឯកឧត្តម រួមទាំងកូនរបស់ឯកឧត្តម ក៏មានបំណងទៅទស្សនាប្រាសាទនានាក្នុងខេត្តសៀមរាបផងដែរ។
ក្នុងជំនួបពិភាក្សាគ្នានោះដែរ ថ្នាក់ដឹកនាំកំពូលទាំងពីរក៏បានពិភាក្សាគ្នាផងដែរទៅលើការរួមគ្នា ប្រយុទ្ធប្រឆាំងឧក្រិដ្ឋកម្មឆ្លងដែន ការជួញដូរមនុស្ស ការប្រយុទ្ធប្រឆាំងអំពើភេរវកម្ម ពិសេសបានពិភាក្សាគ្នាយ៉ាងយកចិត្តទុកដាក់ បញ្ហាតំបន់និងអន្តរជាតិ។
មុននឹងបញ្ចប់នៅក្នុងជំនួបទ្វេភាគីនេះ ក្នុងព្រះបរមនាមព្រះករុណាជាអម្ចាស់ជីវិតលើត្បូង និងក្នុងនាមរាជរដ្ឋាភិបាល សម្តេច បានអញ្ជើញឯកឧត្តម ស៊ី ជិនពីង បំពេញទស្សនកិច្ចផ្លូវរដ្ឋជាថ្មីម្តងទៀត ក្នុងប្រទេសកម្ពុជានាពេលខាងមុខ ឬក្នុងឆ្នាំ២០១៨ដែលជាខួប៦០ឆ្នាំនៃទំនាក់ទំនងការទូតរបស់ប្រទេសទាំងពីរផងដែរ៕
