រ៉ុកែត Falcon 9 របស់ក្រុមហ៊ុន SpaceX ត្រូវបានបង្ហោះចេញពីមជ្ឈមណ្ឌលអវកាស Kennedy នៅលើជ្រោយ Cape Canaveral រដ្ឋ វ្លរីដា សហរដ្ឋអាមេរិក ដើម្បីនាំយកផ្កាយរណបទូរគមនាគមន៍មួយគ្រឿងរបស់ក្រុមហ៊ុន Inmarsat ដែលជាក្រុមហ៊ុនផ្គត់ផ្គង់អ៊ីនធឺណិត និងសេវាទូរស័ព្ទធំបំផុតសម្រាប់ពិភពលោក មានមូលដ្ឋាននៅ ចក្រភពអង់គ្លេស ។
នេះគឺជាផ្កាយរណបធ្ងន់បំផុត មានទម្ងន់ជាង ៦ តោន ធ្វើឲ្យរ៉ុកែតដែលបញ្ជូនផ្កាយរណបនេះទៅកាន់ទីអវកាស មិនអាចមានប្រេងគ្រប់គ្រាន់ដើម្បីចុះចតលើផែនដីសម្រាប់ការប្រើប្រាស់លើកទីពីរបានឡើយ ។ ការបញ្ជូនផ្កាយរណបបន្ថែមមួយគ្រឿងទៀតរបស់ក្រុមហ៊ុន Inmarsat បំណងធ្វើឲ្យដំណើរការសេវាអ៊ីនធឺណិត និងទូរស័ព្ទរបស់អតិថិជន កាន់តែមានល្បឿនលឿនជាងមុន ។ ផ្កាយរណបនេះសាងសង់ដោយក្រុមហ៊ុន Boeing គឺជាផ្កាយរណបទី ៤ នៅក្នុងប្រព័ន្ធផ្កាយរណបរបស់ក្រុមហ៊ុន Inmarsat ។
ទោះយ៉ាងណា ការបញ្ជូនផ្កាយរណបទី ៤ មានតម្លៃ ២៥០ លានដុល្លារ របស់ក្រុមហ៊ុនទូរគមនាគមន៍ ចក្រភពអង់គ្លេសដំណើរការដោយជោគជ័យ ដោយផ្កាយរណបបានទៅដល់គន្លងតារាវិថី ក្រោយហោះហើររយៈពេលប្រមាណ ៣០ នាទី ។ ផ្កាយរណបទាំង ៤ របស់ក្រុមហ៊ុន Inmarsat មានតម្លៃ ១.៦ ពាន់លានដុល្លារ ប្រើប្រាស់ដើម្បីផ្គត់ផ្គង់សេវាទំនាក់ទំនងលើពិភពលោក សម្រាប់អាកាសចរណ៍ នាវាចរណ៍ ភ្នាក់ងាររដ្ឋាភិបាល រហូតដល់ប្រព័ន្ធអ៊ីនធឺណិត និងទូរស័ព្ទ ។
