ប្រធានាធិបតី កូរ៉េខាងត្បូង លោក មូន ចេ-អ៊ីន (Moon Jae-in) បានបញ្ជាឲ្យធ្វើការស៊ើបអង្កេតទៅលើការដាក់ពង្រាយប្រព័ន្ធអាវុធការពារមីស៊ីល (THAAD) នៅភាគខាងត្បូងប្រទេស ក្រោយពីបានដឹងថា ប្រព័ន្ធអាវុធរបស់ សហរដ្ឋអាមេរិក ច្រើនជាងរបាយការណ៍របស់ក្រសួងការពារជាតិ ។
THAAD ត្រូវបានកងទ័ព អាមេរិក ដំឡើងក្នុងតំបន់ សេអុងជូ (Seongju) កាលពីខែ មិនា ដោយរបាយការណ៍បញ្ជាក់ថា ប្រព័ន្ធអាវុធនោះមានចំនួន ៦ កន្លែង ប៉ុន្តែព័ត៌មានដែលលោកប្រធានាធិបតីទើបទទួលបានថ្មីៗបង្ហាញថា THAAD មានចំនួនរហូតដល់ ១០ កន្លែង ដោយក្រសួងការពារជាតិមិនបានផ្ដល់របាយការណ៍ដល់រដ្ឋាភិបាលថ្មី និងមិនបានឲ្យសាធារណជនដឹងឡើយ ។
ចំណែកមន្ទីរបញ្ចកោណអះអាងថា ដំណើរការដំឡើងប្រព័ន្ធអាវុធការពារមីស៊ីលគឺមានតម្លាភាពជាទីបំផុត ដោយកងទ័ព អាមេរិក ធ្វើការជិតស្និទ្ធជាមួយរដ្ឋាភិបាល កូរ៉េខាងត្បូង ដើម្បីដាក់ពង្រាយប្រព័ន្ធអាវុធ ដែលការពារទាំងសម្ពន្ធមិត្ត និងកងទ័ព អាមេរិក ២៨៥០០ នាក់ ក្នុងប្រទេស កូរ៉េខាងត្បូង ។
ប្រភពៈ asiancorrespondent