ក្រសួងការពារជាតិរុស្ស៊ី បានឲ្យដឹងថា យន្តហោះចម្បាំងរបស់ខ្លួនម៉ាក Su-30 បានស្ទាក់ចាប់យន្តហោះឈ្លបយកការណ៍របស់អាមេរិកមួយគ្រឿងម៉ាក P-8A ដែលមានវត្តមានលើដែនសមុទ្រខ្មៅ កាលពីថ្ងៃទី០៩ ខែឧសភាកន្លងមក។ នេះយោងតាមគេហទំព័រព័ត៌មាន រុស្ស៊ី (RT) បានចុះផ្សាយនៅថ្ងៃទី១២ ខែឧសភា ឆ្នាំ២០១៧។
បើតាមសេចក្ដីថ្លែងការណ៍របស់ក្រសួងការពារជាតិរុស្ស៊ីបញ្ជាក់ថា ហេតុការណ៍នេះបានកើតឡើងនៅម៉ោងប្រហែល ៩ព្រឹក ខណៈដែលរ៉ាដាចាប់បានសញ្ញាអាសន្ន នៅលើដែនសមុទ្រខ្មៅ ភ្លាមៗនោះ កម្លាំងការពារដែនអាកាសរបស់ខ្លួនបានចេញយន្តហោះប្រយុទ្ធប្រភេទ Su-30 ទៅស្ទាក់ចាប់និងបណ្ដេញចេញពីព្រំដែន។
គួររម្លឹកផងដែរថា យន្តហោះរបស់អាមេរិកដែលត្រូវបានស្ទាក់ចាប់ដោយយន្តហោះរុស្ស៊ីខាងលើនេះ គឺចំពេលដែល ទីក្រុងមូស្គូប្រារព្ធពិធីគម្រប់ខួបជ័យជំនះ ក្នុងការធ្វើសង្គ្រាមជាមួយ អាល្លឺម៉ង់ ដោយប្រទេសមហាអំណាចមួយនេះ បានហែក្បួនយោធាអមដោយសព្វាវុធទំនើបៗ ជាច្រើនទៀតផង៕
