យន្ដហោះស៊ើបការណ៍របស់កងកម្លាំងការពារជប៉ុនមួយគ្រឿង ម៉ាក LR-2 ដែលបានធ្លាក់ នៅកោះ Hokkaido កាលពីថ្ងៃចន្ទម្សិលមិញ មកទល់ពេលនេះប៉ូលិសទើបប្រទះឃើញសាកសពចំនួន ៤នាក់ ក្នុងនោះមានអ្នកបើកបរ ២នាក់ និងអ្នកបច្ចេកទេស ០២នាក់ទៀត។ នេះបើតាមការចេញផ្សាយដោយសារព័ត៌មានចិន ស៊ិនហួរ នារសៀលថ្ងៃអង្គារ ទី១៦ ខែឧសភា ឆ្នាំ២០១៧។
បើតាមការចុះផ្សាយដោយសារព័ត៌មានជប៉ុន NHK យន្តហោះធុននេះផ្ទុកមនុស្សចំនួន ៤នាក់ ក្នុងចំណោមពួកគេទាំងនោះមាន ២នាក់ជាអ្នកបើកបរ និង ២នាក់ផ្សេងទៀតជាអ្នកបច្ចេកទេស ដែលប្រតិបត្តិការនៅអាកាសយានដ្ឋាន Hakodate Airport ខណៈម៉ោងប្រមាណជា ១១និង ៤៧នាទីព្រឹក (ម៉ោងនៅក្នុងតំបន់) យន្តហោះបានបាត់ចេញពីប្រព័ន្ធរ៉ាដា។
ប្រភពដដែលបន្ថែមទៀតថា យន្តហោះម៉ាក LR-2 នេះបានធ្វើដំណើរទៅផ្ដល់ជំនួយមនុស្សធម៌ ថ្នាំពេទ្យសង្គ្រោះបន្ទាន់ និងដឹកអ្នកជំងឺតាមការស្នើរបស់អភិបាលកោះ Hokkaido ភ្លាមនោះបានធ្លាក់ចុះនៅក្បែរតំបន់ព្រៃមួយកន្លែង ក្នុងទីក្រុង Assabu ខាងត្បូងកោះ Hokkaido។ មនុស្សជិត ៣ពាន់នាក់ដែលបានស្វែងរកសាកសពទាំងនោះ ប៉ុន្តែចំពោះមូលហេតុនៃការធ្លាក់ កំពុងស្ថិតក្រោមការស៊ើបអង្កេតនៅឡើយ៕
